Astronavt Xalqaro kosmik stansiyada kartoshka yetishtirish tajribasini o'tkazdi

Amerika kosmik agentligi astronavti Don Pettit Xalqaro kosmik stansiya sharoitida noodatiy tajriba otkazdi. Bu haqda Zamin.uz xabar berdi.

U vaznsizlik muhitida kartoshka yetishtirishga urinib ko'rdi va ushbu ekinni Spudnik deb nomladi. Bu nom ingliz tilidagi kartoshka anglatuvchi so'z va mashhur Sputnik suniy yo'ldoshi nomining uyg'unligidan hosil qilingan.

Astronavtning ta'kidlashicha, uni ushbu tajribaga Marslik filmi va kitobining syujeti ilhomlantirgan. Mazkur asarda kartoshka yetishtirish bosh qahramonning begona sayyorada omon qolishiga yordam beradi.

Don Pettit kosmik kenglikda tuganak o'zini qanday tutishini va rivojlanish jarayonlarini tekshirib ko'rishga qaror qilgan. Tajribani amalga oshirish uchun u maxsus yoritgichli kichik issiqxona yasadi.

Kartoshka yopishqoq tasma yordamida mahkamlandi va oddiy ichimlik idishi ichida saqlandi. Vaznsizlik holatida o'simlikning novdalari kutilmagan tarzda rivojlana boshladi.

Yer sharoitidan farqli o'laroq, ildizlar pastga emas, balki yuqoriga qarab o'sdi. Astronavt buni hazil aralash noto'g'ri ildizlar deb atadi.

Olimlar kartoshkani kosmik sayohatlar uchun eng istiqbolli ekinlardan biri deb hisoblashmoqda. Chunki u to'yimli va tashqi muhitga nisbatan chidamli o'simlikdir.

Bunday xususiyatlar Oy, Mars va boshqa uzoq masofali kosmik sayohatlarda mustaqil oziq-ovqat tizimini yaratishda katta yordam berishi mumkin. Don Pettit kelajakda Mars sayyorasida kartoshka yetishtirish imkoniyati borligiga ishonchi komil ekanini bildirdi.

Ungacha esa Yer orbitasidagi stansiyada barcha kerakli tadqiqotlar olib borilishi va tajribalar o'tkazilishi rejalashtirilgan.