Apple sun iy intellektga ega aqlli ko‘zoynak yaratmoqda

Apple kompaniyasi sun iy intellekt imkoniyatlariga ega bo‘lgan yangi avlod aqlli ko‘zoynaklarini yaratish ustida ishlamoqda. Bu haqda Zamin.uz xabar berdi.

Mazkur qurilma bozorga chiqqach, Meta Ray Ban kabi mashhur mahsulotlar bilan raqobatlashishi kutilmoqda. Xorijiy manbalarning xabariga ko‘ra, kompaniya ushbu texnologiya orqali foydalanuvchilarga mutlaqo yangi tajriba taqdim etishni rejalashtirgan.

Nashrlar ma’lumotlariga ko‘ra, aqlli ko‘zoynakning dastlabki versiyasi ekransiz shaklda ishlab chiqariladi. Qurilma vizual interfeys o‘rniga ovozli buyruqlar va imo ishoralar yordamida boshqariladi.

Bu esa foydalanuvchining diqqatini tashqi muhitdan chalg‘itmaslikka xizmat qiladi. Yangi qurilma ikkita kameraga ega bo‘lishi kutilmoqda.

Ulardan birinchisi yuqori sifatli surat va videolar olish hamda ularni smartfonlar orqali tezkorlik bilan almashish uchun mo‘ljallangan. Ikkinchi kamera esa keng burchakli bo‘lib, u asosan qo‘l harakatlarini aniqlash va Siri yordamchisi orqali turli funksiyalarni ishga tushirish uchun xizmat qiladi.

Shunday qilib, imo ishoralar qurilma bilan muloqot qilishning asosiy vositasiga aylanadi. Kompaniya mahsulotni yaratishda soddalik va energiya tejamkorligiga alohida e’tibor qaratmoqda.

Qurilmaning ixcham shaklini saqlab qolish va batareya quvvatini tejash maqsadida birinchi versiyada maxsus masofa o‘lchagichlar, uch o‘lchamli datchiklar va ichki displeylar o‘rnatilmaydi. Hozirgi kunda kompaniya Vision Pro va kelgusi AirPods modellarida ham imo ishorali boshqaruv tizimini sinovdan o‘tkazmoqda.

Bu esa aqlli ko‘zoynaklarning yanada mukammal va foydalanuvchi uchun qulay bo‘lishini ta’minlaydi.