DeepSeek kompaniyasi sun’iy intellektni rivojlantirish uchun sarmoya jalb qiladi
DeepSeek kompaniyasi asoschisi Liang Venfeng bo‘lajak sarmoyadorlar bilan uchrashuvda kompaniyaning asosiy maqsadi daromad ketidan quvish emas, balki sun’iy umumiy intellekt texnologiyalarini rivojlantirish ekanini ta’kidladi. Bu haqda Zamin.uz xabar berdi.
Shu bilan birga, ilmiy laboratoriya maqomini saqlab qolgan holda, dasturiy kodlari ochiq bo‘lgan modellarni taqdim etishda davom etishini bildirdi. Bu haqda soha nashrlari xabar bermoqda.
Bloomberg agentligi bergan ma’lumotlarga ko‘ra, bu kompaniya tarixidagi ilk tashqi sarmoya jalb qilish bosqichidir. DeepSeek kamida 300 million dollar miqdorida mablag‘ to‘plashni rejalashtirmoqda.
Mazkur jarayonda kompaniyaning umumiy bozor qiymati taxminan 10 milliard dollarga baholanishi kutilmoqda. Ayrim mutaxassislar uzoq muddatli istiqbolda jalb qilinadigan kapital miqdori 7 milliard dollargacha yetishi mumkinligini taxmin qilmoqdalar.
Shu vaqtga qadar DeepSeek loyihasi to‘liqligicha Liang Venfeng tomonidan asos solingan High-Flyer Quant investitsiya kompaniyasi hisobidan moliyalashtirib kelingan edi. Ilgari tashqi sarmoyadorlardan voz kechish kompaniyaning tadqiqotlar borasidagi mustaqilligini saqlab qolish chorasi sifatida ko‘rilgan.
Biroq hozirgi vaziyat loyiha ko‘lami sezilarli darajada kengayganini ko‘rsatmoqda. Zamonaviy sun’iy intellekt tizimlarini o‘qitish va rivojlantirish xarajatlari hatto eng yirik xedj-fondlar imkoniyatidan ham oshib ketdi.
Strategik yo‘nalish nuqtayi nazaridan kompaniya ochiq modellar va fundamental tadqiqotlarga tayanishda davom etmoqda. Joriy yilning aprel oyida DeepSeek trilliard parametrli yangi modellar oilasini taqdim etdi.
Ushbu tizimlar turli texnologik platformalar va hisoblash qurilmalari uchun maxsus moslashtirilgan. Avvalroq chiqarilgan R1 modeli esa jahon bozorida katta shov-shuvga sabab bo‘lib, ilg‘or tizimlarni yaratish xarajatlari haqidagi tasavvurlarni butunlay o‘zgartirib yuborgan edi.
Hozircha kelishuvning aniq tafsilotlari, sarmoyadorlar ro‘yxati va jarayonning yakuniy muddati ochiqlanmagan. Mutaxassislarning fikricha, bunday yirik miqdordagi mablag‘ to‘plash jarayoni Xitoy davlat idoralari e’tiboridan chetda qolmaydi, chunki mamlakatda sun’iy intellekt ishlab chiquvchilari ustidan nazorat kuchaymoqda.
Kompaniya o‘zining tadqiqot uslubini saqlab qolgan holda, rivojlanishning yangi bosqichiga qadam qo‘ymoqda.
