Qodirovlar oilasi 41 oyda yuzdan ortiq mukofot oldi

Rossiya va Ukraina o‘rtasidagi urush boshlanganidan buyon Checheniston rahbari Ramzon Qodirov hamda uning yaqin qarindoshlari ko‘plab mukofotlarga sazovor bo‘lishdi. Bu haqida Zamin.uz xabar berdi.

“Verstka” nashrining tahlillariga ko‘ra, so‘nggi 41 oy davomida Qodirov shaxsan 31 ta orden va medal olgan, bu taxminan har 40 kunda bir marta mukofotlanishini anglatadi. Bu jarayon nafaqat uning o‘zini, balki oila a’zolarini ham qamrab olgan.

Reytingda ikkinchi o‘rinda uning o‘g‘li Adam Qodirov turadi. U 16 ta mukofotga ega bo‘lib, ularning yarmi ikki oy ichida, ya’ni 2023 yil oktyabr va noyabr oylarida topshirilgan.

Bu davrda Adam Grozniydagi tergov izolatorida mahbus Nikita Juravelni kaltaklagani haqida xabarlar tarqalgan. Bu voqeadan so‘ng unga mukofotlar berilishi ko‘pchilikda hayrat uyg‘otgan.

Uchinchi o‘rinda esa Qodirovning qizi Ayshat Qodirova bor. U 2022 yildan beri 10 ta davlat mukofotiga sazovor bo‘lgan.

Bu mukofotlar oilaviy va siyosiy nufuzning namoyon bo‘lishi sifatida baholanmoqda. Jami 146 ta mukofotning 82 tasi Chechenistonning mahalliy mukofotlari bo‘lib, qolganlari Rossiyaning federal darajadagi vazirliklari va idoralari, xususan Rosgvardiya, Ichki ishlar vazirligi va Federal jazoni ijro etish xizmati tomonidan berilgan.

Bu Qodirovlar oilasining Rossiya davlat tuzilmalari bilan yaqin aloqada ekanligini ko‘rsatadi. Bundan tashqari, ular Ukraina hududlarining anneksiya qilingan qismlaridagi ma’muriyatlar hamda ayrim xorijiy davlatlar, jumladan Liviya va Janubiy Osetiya rasmiylari tomonidan ham mukofotlangan.

Adam Qodirovga doimiy ravishda berilayotgan orden va nishonlar internetda hazil va memlarga sabab bo‘lmoqda. Medialarda e’lon qilinayotgan mukofotlash haqidagi xabarlar nafaqat tanqidiy fikrlarni, balki kulgili munosabatlarni ham yuzaga keltirdi.

“Verstka” ma’lumotlariga ko‘ra, ko‘p hollarda bu mukofotlar Checheniston rasmiylari tomonidan bevosita so‘rov bilan taqdim etiladi. Masalan, 2023 yil oktyabrda Qodirov ma’muriyati Qabarda-Bolqoriya va Adigeya hukumatlaridan Adamga orden berishni so‘ragan.

Dastlab bu so‘rov rad etilgan bo‘lsa-da, bir oy o‘tib Adam Qabarda-Bolqoriyaning eng yuqori mukofotini olgan. Ko‘rinib turibdiki, mukofotlar soni shunchaki raqam emas, ularning ortida katta siyosiy ta’sir va imidj qurish bor.

Shu bilan birga, bu holat ko‘plab savollarni keltirib chiqaradi. Eng katta savol esa shuki, bu mukofotlar qanchalik haqiqiy xizmat uchun berilmoqda.