Keyt Middlton va Uilyam yangi uyga ko‘chdi
Keyt Middlton va shahzoda Uilyam uch nafar farzandi bilan Vindzordagi Forest Lodge nomli sakkiz xonali yangi uyga ko‘chib o‘tdi. Bu haqida Zamin.uz xabar berdi.
Bu haqda Peopletalk nashri ma’lumot berdi. Oldinroq qirollik oilasi Vindzor hududidagi Adelaida kottejida uch yil davomida yashagan edi.
Endilikda ular yangi uyda istiqomat qilish uchun kichik ta’mirlash ishlariga o‘z mablag‘ini ajratmoqda. Ma’lumotlarga ko‘ra, 43 yoshli shahzoda Uilyam Kornuoll gersogligidan yiliga taxminan 30 million dollar daromad oladi.
Kuzatuvchilar fikricha, Uilyam qirollik taxtiga o‘tirgan taqdirda ham oila aynan shu uyda qolishi mumkin. Shu bilan birga, shahzoda Jorj, malika Sharlotta va shahzoda Lui yaqin atrofdagi Ascot shaharchasidagi Lambruk maktabida ta’lim olmoqda.
Oila Adelaida kottejida yashagan davrda bir qator sinovlardan o‘tdi. Malika Keyt o‘tgan yil saraton kasalligidan davolanish jarayonida og‘ir kimyoterapiya kursidan o‘tdi.
Bundan tashqari, ular ko‘chib kelganidan ko‘p o‘tmay, 2022 yil sentyabrda qirolicha Yelizavetaning vafoti sababli motam tutishga majbur bo‘ldi. Shuningdek, yaqinda saraton kasalligidan aziyat chekayotgan qirol Charlz III ning sog‘ligi yomonlashib borayotgani haqida xabarlar tarqalmoqda.
