Ukraina “Flamingo” qanotli raketani sinovdan o‘tkazdi
Ukraina hukumati uzoq masofaga mo‘ljallangan yangi “Flamingo” qanotli raketani muvaffaqiyatli sinovdan o‘tkazdi. Bu haqida Zamin.uz xabar berdi.
Bu haqda mamlakat prezidenti Vladimir Zelenskiy 20-avgust kuni jurnalistlar bilan uchrashuvda ma’lum qildi. Prezidentning ta’kidlashicha, “Flamingo” raketasi Ukraina raketa dasturidagi eng samarali va kuchli loyihalardan biri hisoblanadi.
DW nashrining ma’lumotlariga ko‘ra, raketaning uchish masofasi 3000 kilometrni tashkil etadi. Zelenskiy bu natijani mamlakat mudofaa sohasidagi katta yutuq deb atadi.
Shuningdek, u raketa xususiyatlari to‘liq oshkor qilinmasligini, ma’lumotlar faqat yuztadan ortiq raketa amalda ishlatishga tayyor bo‘lgach e’lon qilinishini bildirdi. Raketalarning ommaviy ishlab chiqarilishi 2025 yil dekabrida yoki 2026 yil boshida boshlanishi rejalashtirilgan.
Ukraina hukumati yangi qurolni yaratish orqali mudofaa qudratini sezilarli darajada oshirishga umid qilmoqda. Ushbu loyiha mamlakat xavfsizligini mustahkamlashda muhim qadam hisoblanadi.
