Trampning qo‘lida ko‘karish va oyoq shishi kuzatildi
AQSH Prezidenti Donald Trampning sog‘lig‘i so‘nggi kunlarda jamoatchilik diqqat markazida qolmoqda. Bu haqida Zamin.uz xabar berdi.
“The Daily Beast” nashrining xabar berishicha, davlat rahbarining qo‘lida ko‘karishlar paydo bo‘lgan va u bu joylarni qalin krem yordamida yashirishga harakat qilgan. Suratlardan ko‘rinib turibdiki, qo‘lning ko‘kargan joylari to‘liq ko‘zga tashlanmaydi, chunki ustiga krem surtilgan.
79 yoshli Tramp o‘z lavozimiga qaytganidan beri bir necha bor o‘ng qo‘lidagi ko‘karishlarni omma oldida kosmetika vositasida yashirgan. Rasmiy Vashington esa avvalroq Prezidentning qo‘lida paydo bo‘lgan ko‘karishlarni tez-tez qo‘l siqishlari bilan bog‘lagan.
Aprel oyida esa shifokor Shon Barbabella Trampning yillik tibbiy ko‘rik natijalarini e’lon qilib, uning jismoniy va aqliy salomatligi a’lo darajada ekanini ma’lum qilgan. Iyul oyida esa Trampga surunkali venoz yetishmovchilik tashxisi qo‘yilgan, biroq uning umumiy sog‘ligi yaxshi ekanligi ta’kidlangan.
Oq uy matbuot kotibi Kerolayn Levittning so‘zlariga ko‘ra, yaqinda olingan fotosuratlarda Prezidentning oyoqlari shishib, qo‘li ko‘kargani ko‘rinmoqda. U tibbiy ko‘rikdan o‘tkazilgan va oyoq shishishi venoz kasallik bilan bog‘liq ekani ma’lum qilingan.
Bu kasallikda oyoq klapanlari eskirib, qonning yurakka qaytishi sustlashadi. Bunday holat ayniqsa 70 yoshdan oshgan odamlarda keng tarqalgan.
Matbuotda aytilishicha, so‘nggi oylarda Prezidentning omma oldidagi chiqishlari va surati uning sog‘ligi joyida ekanligi haqidagi savollarni ko‘paytirmoqda. Shu sababli qo‘ldagi ko‘karishlar va oyoqdagi shishish Trampning salomatligiga nisbatan jamoatchilikning qiziqishini oshirmoqda.
Natijada, uning qo‘li va oyoqlaridagi o‘zgarishlar nafaqat tashqi ko‘rinish nuqtai nazaridan, balki tibbiy jihatdan ham odamlarning e’tiborini tortmoqda.
