Yaponiya smartfondan kuniga ikki soat foydalanishni tavsiya qildi
Yaponiyada raqamli texnologiyalardan ortiqcha foydalanish va sog‘liqqa salbiy ta’sirini kamaytirishga qaratilgan yangi tashabbus e’lon qilindi. Bu haqida Zamin.uz xabar berdi.
Mamlakatning Toeake shahri rahbariyati aholiga kuniga ikki soatdan ortiq smartfondan foydalanmaslikni tavsiya qildi. Ushbu tashabbus majburiy emas, balki ixtiyoriy tavsiya sifatida berilgan.
Tashabbusning asosiy maqsadi raqamli giyohvandlik muammosini kamaytirish va yoshlar hamda kattalar orasida sog‘lom turmush tarzini rag‘batlantirishdir. Yaponiya Bolalar va oilalar agentligi o‘tkazgan so‘rovnoma natijalariga ko‘ra, yoshlar ish kunlari internetda kamida besh soat vaqt sarflaydi.
Bu esa uyqu buzilishi, diqqatni jamlay olmaslik va ruhiy salomatlik muammolariga olib kelishi mumkin. Shu bois ikki soatlik kunlik chegara tavsiya qilinmoqda.
Bundan tashqari, bolalar uchun alohida “komendantlik soati” belgilangan: boshlang‘ich sinf o‘quvchilari soat 21:00 dan keyin, o‘rta va yuqori sinf o‘quvchilari esa 22:00 dan keyin smartfondan foydalanmasliklari kerak. Toeake shahri meri Masafumi Koki bu cheklovlarning majburiy emasligini ta’kidladi.
U smartfondan ortiqcha foydalanish salbiy oqibatlarga olib kelishini eslatib, aholining ushbu tavsiyalarga jiddiy e’tibor qaratishini so‘radi. Loyihaning yakuniy qarori kelasi hafta qabul qilinadi va agar tasdiqlansa, oktyabr oyidan kuchga kiradi.
Tashabbus jamoatchilikda turli fikr va bahs-munozaralarga sabab bo‘ldi. Ayrim foydalanuvchilar ikki soatlik cheklov film ko‘rish yoki elektron kitob o‘qish uchun yetarli emasligini bildirsa, boshqalar bunday qarorlarni davlat emas, balki oila va shaxsning o‘zi hal qilishi kerakligini ta’kidlashmoqda.
