Transport vaziri tezlik chegarasini oshirib jarimaga tortildi
Transport vaziri Abdulqodir O‘rolo‘g‘li o‘zining shaxsiy avtomobilini boshqarayotganda belgilangan tezlik chegarasidan oshib ketgani uchun jarimaga tortildi. Bu haqida Zamin.uz xabar berdi.
Ushbu holat ijtimoiy tarmoqlarda keng muhokamalarga sabab bo‘ldi va ommaviy axborot vositalarida keng yoritildi. Ma’lum bo‘lishicha, vazir Anqaradan Nig‘de tomon yo‘l olganida avtomobil tezligini 225 kilometr soatga yetkazgan.
Bu esa yo‘l harakati qoidalarida belgilangan 140 kilometr soatlik cheklovdan ancha yuqori edi. Vazirning bu harakati yo‘l xavfsizligi nuqtai nazaridan jiddiy e’tiborga molik deb baholandi va ko‘plab tanqidlarga sabab bo‘ldi.
Abdulqodir O‘rolo‘g‘li o‘z xatosini tan olib, ijtimoiy tarmoqlarda tarqalgan videolavhada tezlikni oshirganini tan olganini ma’lum qildi. U o‘z ixtiyori bilan politsiyaga murojaat qilib, qoidabuzarlik uchun 9267 lira miqdorida jarima to‘laganini bildirdi.
Vazir barcha fuqarolar singari, hatto davlat xizmatchilari ham qonun oldida teng ekanligini ta’kidlab, har qanday xato uchun javobgarlik bo‘lishi lozimligini qayd etdi. Uning fikricha, davlat xizmatchilari qonunlarga qat’iy rioya qilishi va xatolarga yo‘l qo‘ymasligi zarur.
