Turkiya Isroil bilan dengiz va havo qatnovini to‘xtatdi

Turkiya tashqi ishlar vaziri Hakan Fidan mamlakat Isroil bilan dengiz va havo qatnovlariga qat’iy cheklovlar joriy qilganini ma’lum qildi. Bu haqida Zamin.uz xabar berdi.

Endilikda Isroil kemalari Turkiya portlariga kira olmaydi. Shuningdek, turk kemalariga ham Isroil portlaridan foydalanish taqiqlanadi.

Isroilga qurol-yarog‘ tashiydigan konteyner kemalari esa Turkiya hududiga umuman kiritilmaydi. Turkiya Isroilni G‘azodagi talafotlar uchun ayblab, xalqaro hamjamiyatni unga qarshi chora ko‘rishga chaqirmoqda.

Shu yil boshida Anqara Isroil bilan barcha savdo aloqalarini ham to‘xtatgan edi. Turkiya port ma’muriyatlari yaqinda agentlardan kemalarning Isroil bilan aloqasi yo‘qligini va u yerga xavfli yuk olib bormayotganini tasdiqlashni talab qila boshladi.

Hakan Fidan shuningdek, Turkiya G‘azoga havo orqali yordam yuborishga tayyorligini bildirdi. Uning so‘zlariga ko‘ra, samolyotlar hozirda tayyor turibdi, ammo mintaqa rasmiylaridan ruxsat kutilmoqda.

Isroil hukumati esa ushbu bayonotlarga hozircha izoh bermadi. Bu chora-tadbirlar Turkiya va Isroil o‘rtasidagi munosabatlardagi keskinlikni yanada oshirmoqda.

Turkiya o‘z pozitsiyasini qat’iy ifoda etib, xalqaro hamjamiyatdan Isroilga bosim o‘tkazishni so‘ramoqda.