Kim Chen In Ukrainada halok bo‘lgan askarlar oilasi bilan uchrashdi
Shimoliy Koreya yetakchisi Kim Chen In Ukrainada Rossiya tomonida jang qilib halok bo‘lgan askarlarning oilalari bilan uchrashdi. Bu haqida Zamin.uz xabar berdi.
U marhum askarlarga hamdardlik bildirib, ularning xotirasini yodga olish maqsadida ularning suratlarini bayroqqa o‘rab oilalariga topshirdi. Ushbu marosim Pxenyanda o‘tkazildi.
Nutqida Kim Chen In askarlarni tirik qaytarib kelolmagani uchun afsus bildirdi. Shuningdek, u halok bo‘lganlar sharafiga yodgorlik barpo etilishi va ularning farzandlariga g‘amxo‘rlik ko‘rsatilishini va’da qildi.
Janubiy Koreya manbalarining ma’lumot berishicha, Shimoliy Koreya Rossiyaga yordam sifatida taxminan 15 ming askar yuborgan, shuningdek, raketa va boshqa qurollar ham yetkazilgan. Evaziga Pxenyan oziq-ovqat va texnik yordam olgan.
G‘arb rasmiylari esa yuzlab shimoliy koreyalik askar janglarda halok bo‘lganini, minglab askarlar esa jarohat olganini ma’lum qilishgan. Kelasi hafta Kim Chen In Xitoyda o‘tkaziladigan harbiy paradda Rossiya prezidenti Vladimir Putin bilan uchrashishi kutilmoqda.
Bu ularning so‘nggi ikki yil ichida uchinchi marta uchrashuvi bo‘lib, ikki davlat o‘rtasidagi hamkorlikning yanada kuchayib borayotganidan dalolat beradi.
