Sudanda kuchli ko‘chki yuz berdi, yuzlab halok bo‘ldi
Sudanning Darfur mintaqasidagi Marra tog‘larida kuchli yomg‘irlar oqibatida ko‘chki yuz berdi. Bu haqida Zamin.uz xabar berdi.
Birlashgan Millatlar Tashkiloti ma’lumotlariga ko‘ra, kamida 370 kishi halok bo‘lgan, ammo qurbonlar soni bundan ham ko‘proq bo‘lishi mumkin. Mahalliy aholi esa halok bo‘lganlar soni ming nafarga yetganini bildirgan.
Ko‘chki oqibatida Tarseen qishlog‘ining katta qismi vayron bo‘ldi. Qutqaruvchilar hozirga qadar faqat to‘qqiz kishining jasadini topdi.
Qishloqda yuzlab oilalar istiqomat qilgan va ko‘plab odamlar hanuzgacha bedarak yo‘qolgan hisoblanadi. Birlashgan Millatlar Tashkiloti qutqaruvchilarni, oziq-ovqat, ichimlik suvi va boshqa zarur yordamlarni yetkazmoqda.
Biroq tog‘li hududga kirish juda qiyin bo‘lib, yomg‘ir va yomon yo‘llar qutqaruv ishlarini sekinlashtirmoqda. Shu sababli yordam havo orqali yetkazilishi rejalashtirilgan.
Darfur gubernatori ushbu voqeani katta fojia deb atadi va xalqaro hamjamiyatni zudlik bilan yordam berishga chaqirdi. Voqea joyida yordam ishlarini tezlashtirish va jabrlanganlarga qo‘llab-quvvatlash ko‘rsatish muhim ahamiyatga ega.
