Jakartada ayollar davlat sarfini tanqid qildi
Indoneziya poytaxti Jakarta shahrida yuzlab ayollar pushti rangli kiyim kiyib, qo‘llarida supurgi bilan parlament binosi oldida namoyish o‘tkazdi. Bu haqida Zamin.uz xabar berdi.
Ular davlat mablag‘larining behuda sarflanishi va politsiya zo‘ravonligiga qarshi norozilik bildirdi. Supurgi ular uchun “davlatdagi kirlarni supurib tashlash” ramzi sifatida ishlatildi.
Namoyishlar ikki haftadan beri davom etmoqda va ular hayot narxining oshishi hamda deputatlarning ortiqcha imtiyozlariga qarshi boshlangani ma’lum. Rasmiy ma’lumotlarga ko‘ra, avgust oyining oxirida yuzaga kelgan noroziliklar paytida kamida o‘n kishi halok bo‘lgan, mingdan ortiq shaxs esa shifoxonaga yotqizilgan.
Prezident Prabowo Subianto dastlab Xitoyga qilgan safarini bekor qilganini bildirgan bo‘lsa-da, keyinchalik Pekinda o‘tkazilgan harbiy paradda qatnashgani ma’lum bo‘ldi. U deputatlarning ayrim imtiyozlarini qisqartirishga va’da bergan, ammo namoyishchilar bu chorani yetarli deb hisoblamayapti.
Birlashgan Millatlar Tashkiloti va inson huquqlari tashkilotlari Indoneziya hukumatini norozilik namoyishlariga zo‘ravonlik bilan javob bergani uchun tanqid qildi. Mutaxassislar esa aholining kengroq islohotlar – tenglik, ta’lim, qishloq xo‘jaligi va adolatli iqtisodiy imkoniyatlar yaratishni kutayotganini ta’kidlashmoqda.
