Hindistonda tibbiyot tarixida noyob va murakkab jarrohlik amaliyoti muvaffaqiyatli amalga oshirildi. Bu haqida Zamin.uz xabar berdi.
Haryana shtatining Gurgaon shahrida joylashgan shifoxonada bir oylik chaqaloqqa operatsiya qilinib, uning qornidan ikki rivojlanmagan homila olib tashlandi. Bu haqda The Times of India nashri ma’lumot berdi.
Mazkur holat tibbiyotda “homila ichida homila” deb ataladi va juda kam uchraydi, har 500 mingta homiladorlikdan birida ro‘y beradi. Odatda bunday anomaliya homiladorlikning dastlabki haftalarida yuzaga keladi: ikki egizakdan biri to‘liq rivojlanmay, ikkinchi homila ichiga joylashib qoladi.
Shifokorlar ma’lumotiga ko‘ra, chaqaloq onasi uch egizak tug‘ishi kutilgan, lekin homiladorlik davomida ulardan biri qolgan ikkitasini o‘ziga singdirgan. Tug‘ilgandan 20 kun o‘tib, chaqaloqning qorni shishib, ovqatlanishi to‘xtagani sababli shifoxonaga olib kelingan.
Tekshiruvda uning oshqozonini siqib turgan o‘sma shaklidagi tuzilmalar aniqlangan. Jarrohlik paytida bu tuzilmalar rivojlanmagan embrionlar ekanligi ma’lum bo‘lgan.
Operatsiyada 15 nafar malakali shifokor ishtirok etdi. Ikki soat davom etgan murakkab jarrohlikda chaqaloqning ichki organlariga zarar yetkazmaslik uchun alohida ehtiyotkorlik bilan ish olib borildi.
Shifokorlardan biri bu holatni juda noyob deb ta’kidladi va kichik organizmda bunday murakkab operatsiyani aniqlik bilan bajarish qiyin bo‘lganini bildirdi. Mutaxassislarning so‘zlariga ko‘ra, jarrohlikdan so‘ng chaqaloq tezda sog‘lig‘ini tiklab, hozirda uning ahvoli barqaror.
Bu holat tibbiyot sohasida katta yutuq sifatida baholanmoqda.
