Rossiyalik kema egasi Bayrut porti portlashida hibsga olindi

Bolgariyada 2020-yilda Livan poytaxti Bayrut portida yuz bergan dahshatli portlash bilan bog‘liq tergov davomida muhim shaxs sifatida ko‘rsatilgan rossiyalik kema egasi Igor Grechushkin hibsga olindi. Bu haqda Zamin.uz xabar berdi.

Bu haqda AP axborot agentligi Livan adliya tizimidagi to‘rt manbaga tayangan holda ma’lumot berdi. Ma’lumotlarga ko‘ra, Grechushkin va kema kapitani Boris Prokoshevga nisbatan Livan tergov sudyasi tomonidan ikkita xalqaro qidiruv orderi chiqarilgan edi.

Interpol tomonidan qidiruv besh yil davom etganidan so‘ng, Grechushkin Bolgariyada qo‘lga olindi. Hozirda Livan adliya organlari Grechushkinni Bayrutga ekstraditsiya qilish uchun rasmiy so‘rovnoma tayyorlamoqda.

Agar bu amalga oshmasa, tergovchilar uni so‘roq qilish maqsadida o‘zlari to‘g‘ridan to‘g‘ri Bolgariyaga borishlari mumkinligi aytilmoqda. AP agentligi ma’lumotiga ko‘ra, Grechushkin Rossiya va Kipr fuqaroligiga ega bo‘lib, u o‘tgan hafta Kiprdan Bolgariya poytaxti Sofiyaga kelganida aeroportda hibsga olingan.

Eslatib o‘tamiz, 2020-yilda Bayrut portida saqlangan ammiakli selitra portlashi yuz bergan. Bu voqea minglab odamlarning hayotiga ta’sir ko‘rsatib, Livan tarixidagi eng yirik sanoat halokatlaridan biri hisoblanadi.

Hozirga qadar bu fojia jiddiy oqibatlari bilan esda qolmoqda.