Tramp Xitoy va Hindistonni urushni moliyalashtirishda aybladi
AQSH prezidenti Donald Tramp 23-sentyabr kuni Nyu-Yorkda bo‘lib o‘tgan BMT Bosh assambleyasida so‘zlagan nutqida Xitoy va Hindistonni Ukrainadagi urushning asosiy homiylari deb atadi. Bu haqda Zamin.uz xabar berdi.
Trampning fikricha, ushbu ikki mamlakat Rossiya bilan iqtisodiy aloqalarni davom ettirib, Rossiyaning neft mahsulotlarini sotib olmoqda. Uning so‘zlariga ko‘ra, Xitoy va Hindiston Rossiyaning urushdagi harakatlarini moliyalashtirishda muhim rol o‘ynaydi.
Shuningdek, Tramp Yevropa davlatlarini ham tanqid qilib, ularni Rossiya energiya resurslarini sotib olishda davom etayotganliklari uchun qoraladi. U Yevropa davlatlarini bu holatni “sharmandali” deb atab, ular Rossiya bilan urushayotgan paytda neft va gaz sotib olishni to‘xtatishi kerakligini ta’kidladi.
Trampning fikricha, Yevropa davlatlari bunday siyosatni davom ettira olmaydi va faolroq harakat qilishi lozim. Boshqa tomondan, Xitoy Tashqi ishlar vazirligi rasmiy vakili Go Szyakun Ukraina inqirozi bo‘yicha Xitoyning adolatli va xolis pozitsiyada ekanligini, bu mojaroning tashabbuskori yoki ishtirokchisi emasligini ma’lum qildi.
Hindiston bosh vaziri Narendra Modi esa, davlatlar o‘rtasidagi nizolarni tinch yo‘l bilan hal qilish va tinchlikni tiklashga qaratilgan sa’y-harakatlarni qo‘llab-quvvatlashini bildirdi. AQSH Moliya vazirligi esa Yevropa Ittifoqi davlatlari hamda “Katta yettilik” guruhiga a’zo mamlakatlarni Ukrainadagi urush tugamaguncha Rossiya neftini sotib olishni to‘xtatishga chaqirdi.
Shuningdek, Xitoy va Hindistonga qarshi jiddiy bojlar joriy etilishi mumkinligini ma’lum qildi. Xitoy Tashqi ishlar vazirligi esa bu chaqiriqlarni iqtisodiy bosim va qo‘rqitish sifatida baholadi.
