Falastin uchun xalqaro moliyaviy yordam koalitsiyasi tuzildi
Fransiya, Buyuk Britaniya, Yaponiya va Saudiya Arabistoni kabi o‘n ikki mamlakat Falastin ma’muriyatini qo‘llab-quvvatlash maqsadida yangi xalqaro koalitsiya tashkil etdi. Bu haqda Zamin.uz xabar berdi.
Bu haqda Fransiya Tashqi ishlar vazirligi ma’lum qildi. Koalitsiyaning asosiy vazifasi Falastinning moliyaviy barqarorligini ta’minlash, ma’muriy tizimni saqlab qolish hamda aholiga ijtimoiy xizmatlarni uzluksiz yetkazib berishni ta’minlashdir.
Ushbu tashabbus Isroil hukumati tomonidan Falastinning soliq va bojxona tushumlari ushlab qolinganidan keyin yuzaga kelgan moliyaviy qiyinchiliklarga javoban amalga oshirilmoqda. Koalitsiya a’zolari Falastinga kamida 170 million dollar miqdorida yordam berishni va’da qilgan.
Shundan 90 million dollar Saudiya Arabistoni tomonidan ajratiladi. Bundan tashqari, koalitsiya Isroilni Falastinning moliyaviy tushumlarini kechiktirmasdan o‘tkazishga va ma’muriyat ish faoliyatiga to‘siq qo‘ymaslikka chaqirmoqda.
Hozirgi kunga qadar dunyoda 150 dan ortiq davlat Falastinni mustaqil davlat sifatida tan olgan. Ushbu xalqaro tan olish Falastinning o‘z-o‘zini boshqarish jarayonini yanada mustahkamlashga imkon yaratishi mumkin.
