Tramp Chikagoga milliy gvardiya yuborishni ma’qulladi

AQSh Prezidenti Donald Tramp Chikagodagi jinoyatchilik darajasini nazorat qilish maqsadida 300 nafar milliy gvardiya xodimini yuborishni ma’qulladi. Bu haqda Zamin.uz xabar berdi.

Uning ta’kidlashicha, shahar xavfsizligi izdan chiqqan va bu qaror immigratsiya xodimlari bilan namoyishchilar o‘rtasidagi to‘qnashuvdan keyin qabul qilingan. Illinoys shtati gubernatori Jey Bi Pritsker esa bu harakatni vakolatni suiiste’mol qilish deb atab, prezident shtat roziligisiz harbiy kuch yuborishga haqli emasligini bildirdi.

Oregon shtatida ham shunga o‘xshash qaror vaqtincha to‘xtatilgan edi. Oq uy ushbu chorani federal xodimlar va davlat mulkini himoya qilish uchun zarur deb tushuntirdi.

Tramp esa tartibsizliklar fonida tinchlikni tiklashni maqsad qilganini ma’lum qildi. Hozirda milliy gvardiya xodimlarining shaharga yetib kelganligi haqida aniq ma’lumot yo‘q.

Mutaxassislar esa bu qarorning Chikagoda siyosiy bahslarni kuchaytirishi mumkinligini ta’kidlashmoqda. Ushbu voqea mamlakatdagi ichki xavfsizlik va siyosiy muhitga ta’sir ko‘rsatishi ehtimoldan holi emas.