Lay’s brendi retsept va dizaynini yangiladi
Lay’s brendi o‘zining deyarli bir asrlik tarixidagi eng katta yangilanishni boshdan kechirmoqda. Bu haqda Zamin.uz xabar berdi.
PepsiCo kompaniyasining ma’lumotlariga ko‘ra, Lay’s uchun to‘liq rebrending va retsept yangilanishi amalga oshirilmoqda. PepsiCo bosh dizayn direktori Karl Gerxhardning ta’kidlashicha, bu yangilanish brendga bo‘lgan muhabbat va sodiqlikni ifodalaydi.
Yangi dizayn orqali jamoa Lay’sning butun dunyoda mashhur ta’mini zamonaviy uslubda namoyish etishni maqsad qilgan. Lay’s endi har bir chipning markazida haqiqiy kartoshka va inson mehnati yotganini ko‘rsatishni ko‘zlamoqda.
Kompaniya sun’iy ta’m va ranglardan voz kechib, iste’molchilarga sog‘lom va xilma-xil mahsulotlarni taklif etishni rejalashtirmoqda. Lay’s Baked va Lay’s Kettle Cooked turlari ham yangi retsept asosida ishlab chiqariladi.
Masalan, pishirilgan chiplar endilikda zaytun moyida tayyorlanadi va oddiy chiplarga nisbatan yog‘ miqdori 50 foizga kamaytirilgan. Dengiz tuzi bilan ta’mlangan yangi Lay’s esa avakado moyidan foydalaniladi va yog‘ miqdori 40 foizga kamroq.
Dunyo bo‘ylab 4000 dan ortiq kartoshka navlari mavjud bo‘lsa-da, Lay’s faqat ularning 10 tasini ishlab chiqarish uchun mos deb hisoblaydi. Kompaniya fermerlar bilan hamkorlikda eng sifatli kartoshkani yetishtirish uchun 9 yilgacha vaqt sarflaydi.
Bu esa mahsulot sifatiga alohida e’tibor qaratilayotganidan dalolat beradi.
