Kodi Uilyams onasining hayotini qutqardi
AQSHning Michigan shtatida yashovchi uch yoshli bola Kodi Jeyms Uilyams onasining hayotini qutqarib, mamlakat bo‘ylab qahramon sifatida tanildi. Bu haqda Zamin.uz xabar berdi.
Voqea ayol og‘ir epileptik tutqanoq xurujiga uchraganida yuz berdi. Onasining qiyin ahvolini ko‘rgan Kodi hech ikkilanmasdan harakat qildi.
U oldin ham onasining bu kasallikdan aziyat chekkanini ko‘rganligi sababli vaziyatda sovuqqonlikni saqladi. Kodi onasining telefonini olib, yuziga tutib qulfini ochdi va 911 favqulodda yordam xizmatiga qo‘ng‘iroq qildi.
Bu yosh bola uchun g‘ayrioddiy hol bo‘lsa-da, u vaziyatni to‘g‘ri baholab, tez yordam chaqirishga muvaffaq bo‘ldi. Bir necha daqiqa ichida tibbiy yordam yetib kelib, onaning hayoti saqlab qolindi.
Mahalliy politsiya boshlig‘i Maykl Bushard voqeadan so‘ng maxsus matbuot anjumani o‘tkazdi. U Kodiyni “kichik deputat” deb atab, unga ramziy politsiya nishonini topshirdi.
Bushardning so‘zlariga ko‘ra, bola haqiqiy jasorat va tez fikrlash namunasi bo‘ldi. Politsiya boshlig‘i shuningdek, bu voqeaning ota-onalar uchun katta saboq ekanini ta’kidladi.
U farzandlarni favqulodda vaziyatlarda to‘g‘ri harakat qilishga o‘rgatish muhimligini yana bir bor eslatdi. Hozirda Kodi va onasi sog‘lom va yaxshi ahvolda.
Qo‘shnilar va mahalliy jamoatchilik ularni tabriklab, bolani “qahramon bola” deb atashmoqda. Kodi esa hozircha o‘zining qilgan ishining qanchalik muhimligini to‘liq anglay olmasa-da, uning jasorati butun mamlakatda katta e’tibor qozondi.
