Luvrda Napoleon taqinchoqlari o‘g‘irlandi
Bugun Parijning mashhur Luvr muzeyida katta o‘g‘irlik sodir bo‘ldi. Bu haqda Zamin.uz xabar berdi.
Ma’lumotlarga ko‘ra, Napoleon va imperator Jozefinaga tegishli bo‘lgan qimmatbaho taqinchoqlar kolleksiyasidan to‘qqizta buyum yo‘qolgan. Fransiya madaniyat vaziri Rashida Dati ijtimoiy tarmoqdagi sahifasida hodisa haqida shunday ma’lumot berdi: “Bugun ertalab, Luvr muzeyi ochilishi vaqtida o‘g‘irlik yuz berdi.
Hodisada jabrlanuvchilar yo‘q. Hozir men muzey xodimlari va politsiya vakillari bilan voqea joyidaman.” Luvr ma’muriyati 19 oktyabrda muzey favqulodda holat sababli vaqtincha yopilganini rasmiy ravishda ma’lum qildi.
Le Parisien nashrining yozishicha, o‘g‘rilar ta’mirlash ishlari davomida yuk lifti orqali binoga kirib, oyna va eshiklarni sindirib, Appolon galereyasiga yetib borishgan. Tergov ma’lumotlariga ko‘ra, o‘g‘irlik juda tez, atigi yetti daqiqa ichida amalga oshirilgan.
O‘g‘rilar tog‘ora, marjon, jig‘a va tiarani o‘z ichiga olgan to‘qqizta qimmatbaho buyumni olib qochishgan. Hozirda muzey mutaxassislari inventarizatsiya jarayonida bo‘lib, yo‘qolgan buyumlarning aniq ro‘yxatini tuzmoqda.
Politsiya esa Parij tarixidagi eng sirli madaniy o‘g‘irliklardan biri bo‘yicha surishtiruv ishlarini boshladi. Ushbu voqea madaniyat sohasidagi katta zarba hisoblanadi va uning tafsilotlari jamoatchilikka tez orada yetkaziladi.
