Jahonda bolalar orasida ortiqcha vazn va semizlik muammosi tez sur’atlarda oshib bormoqda. Bu haqda Zamin.uz xabar berdi.
BMTning Oziq-ovqat va qishloq xo‘jaligi tashkiloti tomonidan 16 oktyabr — Jahon oziq-ovqat kuni munosabati bilan taqdim etilgan hisobotda ushbu xavfli tendensiya yana bir bor qayd etildi. Hisobotga ko‘ra, 2024 yilda dunyo bo‘ylab 670 million kishi ochlikdan aziyat chekmoqda.
Shu bilan birga, 391 million bola ortiqcha vaznga ega, ulardan 188 millioni esa og‘ir semizlik darajasida hisoblanadi. Ya’ni, har besh boladan biri ortiqcha vazn bilan, har o‘ntadan biri esa semizlik bilan to‘qnash kelmoqda.
FAO tahlilchilari bu muammo ayniqsa Lotin Amerikasi, Yaqin Sharq, Shimoliy Afrika va Amerika qit’alarida jiddiy ko‘rinishda namoyon bo‘layotganini ta’kidlashmoqda. Masalan, Chilida bolalarning 58 foizi, Janubiy Tinch okeani orollarida esa taxminan yarmi ortiqcha vazn muammosiga duch kelmoqda.
Mutaxassislarning fikricha, noto‘g‘ri ovqatlanish, harakatsiz turmush tarzi va tayyor ovqatlarga qaramlik bu holatning asosiy sabablaridir. Bu esa bolalarning sog‘lig‘iga katta xavf tug‘diradi.
FAO va Jahon sog‘liqni saqlash tashkiloti sog‘lom turmush tarzini shakllantirish, to‘g‘ri ovqatlanishni o‘rgatish hamda bolalarni sport bilan shug‘ullanishga jalb qilish bo‘yicha davlatlar miqyosida keng qamrovli dasturlarni amalga oshirish zarurligini ta’kidlamoqda. Olimlarning fikricha, semizlik nafaqat jismoniy, balki ruhiy salomatlikka ham salbiy ta’sir ko‘rsatadi.
Shu sababli, ushbu muammoga qarshi kurashish global darajadagi ustuvor vazifa sifatida qabul qilinishi lozim.
