Pikassoning asari Parij auksionida 37 millionga sotildi
Parijda o‘tkazilgan auksionda Pablo Pikassoning “Gul naqshli shlyapa kiygan ayol byusti (Dora Maar)” nomli asari 37 million dollarga sotildi. Bu haqda Zamin.uz xabar berdi.
Dastlab asar 9 dan 11,6 million dollar orasida baholangan edi, ammo yakuniy narxi kutilganidan to‘rt baravar ko‘p bo‘ldi. Ushbu rasm mashhur rassomning ilhom manbai va sevgilisi bo‘lgan Dora Maarning portreti hisoblanadi.
Pikasso bu asarni 1943 yil iyul oyida yaratgan. Keyinchalik, 1944 yilda, asar xususiy kolleksiyaga o‘tib, 80 yil davomida shaxsiy qo‘llarda saqlangan.
Mutaxassislarning fikricha, asarning saqlanish holati mukammal darajada. Dora Maar o‘zi ham rassom va fotograf sifatida faoliyat yuritgan.
Uning Pablo Pikasso bilan munosabatlari 1936 yildan 1945 yilgacha davom etgan. San’at tanqidchilari ta’kidicha, ushbu asar nafaqat Pikassoning sevgi va ilhom davrini ifodalaydi, balki u yaratgan ikkinchi jahon urushi yillaridagi ruhiy holatini ham aks ettiradi.
Bu rasm san’at tarixida muhim o‘rin tutadi va rassomning ijodiy faoliyatidagi o‘ziga xos davrni ko‘rsatadi.
