Luvr muzeyidan qimmatbaho buyumlar o‘g‘irlandi
Fransiya huquqni muhofaza qilish idoralari dunyodagi eng mashhur muzeylardan biri hisoblangan Luvrda sodir etilgan katta o‘g‘irlik ishi bo‘yicha ikki nafar gumonlanuvchini qo‘lga oldi. Bu haqda Zamin.uz xabar berdi.
Bu haqda BBC xabar qilgan bo‘lib, ma’lumot Parij prokuraturasi tomonidan ham tasdiqlandi. Hozircha rasmiylar ushlanganlar sonini ochiqlamagan, ammo dastlabki ma’lumotlarga ko‘ra, ulardan biri “Parij – Sharl-de-Goll” aeroportida xorijga parvoz qilish arafasida to‘xtatilgan.
Ikkinchi gumonlanuvchi esa Parij chetidagi Sen-Sen-Deni shaharchasida ushlangan. Manbalarga ko‘ra, har ikki shaxs ilgari ham politsiya nazoratida bo‘lgan va jinoiy faoliyatda gumon qilingan.
AFP agentligi ma’lumotiga ko‘ra, gumonlanuvchilardan biri Jazoyirga uchmoqchi bo‘lgan. Luvrdagi talonchilik voqeasi o‘tgan yakshanba kuni kunduzi sodir bo‘lgan.
Jinoyatchilar zinapoya orqali muzeyga kirib, deraza oynasini kesib ichkariga o‘tgan va metall seyflarni ochib, qimmatbaho artefaktlarni o‘g‘irlagan. Bu jinoyat atigi sakkiz daqiqa davom etgan va unda niqob taqqan to‘rt kishi ishtirok etgan.
Ulardan ikkitasi bino ichida bo‘lib, qolganlari tashqarida kuzatuvchi vazifasini bajargan. Tergovchilar bu jinoyat yaxshi rejalashtirilgan va professional tarzda amalga oshirilgan deb hisoblamoqda.
Parij prokurori Lora Bekkua shanba kuni BBC so‘roviga javoban tergovchilar 25-oktyabr kuni kechqurun hibsga olishni amalga oshirganini ma’lum qildi. Ularning aytishicha, gumonlanuvchilardan biri mamlakatdan chiqishga urinib ko‘rgan.
Tergov hozirda qizg‘in bosqichda davom etmoqda va so‘roq jarayoni 96 soatgacha cho‘zilishi mumkin. Prokuror tergov tafsilotlarini erta oshkor qilish ishga salbiy ta’sir ko‘rsatishi mumkinligini ta’kidladi.
O‘g‘irlangan buyumlar orasida XIX asrga oid, Napoleon Bonapart va uning oila a’zolariga tegishli olmoslar va qimmatbaho toshlar bilan bezatilgan taqinchoqlar, diademalar va marjonlar mavjud. Ularning umumiy qiymati taxminan 88 million yevro, ya’ni 102 million dollarga teng.
Ba’zi ekspertlar o‘g‘rilar buyumlarni qismlarga ajratib, tarixiy qiymatidan past narxda sotishga harakat qilayotgan bo‘lishi mumkin, deb hisoblamoqda. Fransiya adliya vaziri ushbu voqeani mamlakat madaniy merosiga yetkazilgan katta zarar deb baholadi va muzeydagi xavfsizlik choralarining yetarli emasligini tan oldi.
Shuningdek, jinoyat joyi yaqinida imperatritsa Yevgeniyaga tegishli toj ham topilgan. Bu buyumlar o‘g‘rilar tomonidan qochish paytida tashlab ketilgan yoki yo‘qotilgan bo‘lishi mumkin.
Tergov ishlarini davom ettirmoqda. Fransiya matbuoti bu voqeani “asr o‘g‘irligi” deb atamoqda, chunki u nafaqat moliyaviy, balki madaniy va tarixiy jihatdan ham katta yo‘qotish hisoblanadi.
