Putin “Burevestnik” yadroviy raketasini muvaffaqiyatli sinadi
Rossiya prezidenti Vladimir Putin yaqinda yangi yadroviy qurol sinovlarining muvaffaqiyatli yakunlangani haqida ma’lum qildi. Bu haqda Zamin.uz xabar berdi.
Bu qurol “Burevestnik” deb nomlangan, yadroviy kallak o‘rnatilgan qit’alararo raketadir. Putin ushbu raketani noyob, cheklanmagan masofaga uchuvchi va boshqa davlatlarda mavjud bo‘lmagan qurol sifatida ta’rifladi.
Uning so‘zlariga ko‘ra, “Burevestnik” hal qiluvchi sinovlardan muvaffaqiyatli o‘tgan va endi uni amaliy xizmatga joriy etish uchun zarur infratuzilma yaratilmoqda. Rossiya bosh shtab rahbari Valeriy Gerasimovning ma’lumotiga ko‘ra, 21-oktyabr kuni o‘tkazilgan sinovda raketa havoda taxminan 15 soat davomida parvoz qilib, 14 ming kilometr masofani bosib o‘tgan.
Gerasimov bu masofa chegarasi emasligini ta’kidladi va raketa har qanday mudofaa tizimini chetlab o‘tishi hamda yuqori aniqlik bilan maqsadga yetib borishini bildirdi. Putinning ta’kidlashicha, “Burevestnik” Rossiyaning yadroviy salohiyatini yanada mustahkamladi.
Mamlakat eng yuqori tayyorgarlik darajasida bo‘lib, raketani qurolli kuchlarda joylashtirish yaqin kelajakda boshlanishi kutilmoqda. Ushbu raketa haqida birinchi bor 2018-yilda Putin Federal majlisga murojaatida so‘z yuritgandi.
G‘arb razvedkasi ma’lumotlariga ko‘ra, “Burevestnik” 2017–2019-yillar oralig‘ida 13 marta sinovdan o‘tkazilgan, ammo faqat ikki sinov nisbatan muvaffaqiyatli bo‘lgan. 2019-yilda sinov vaqtida raketa Barens dengiziga qulab tushib, portlash yuzaga kelgan.
Bu hodisa oqibatida yetti kishi halok bo‘lgan, jumladan Sarov yadroviy markazi olimlari ham bor. Portlash natijasida radiatsiya buluti Severodvinsk hududini qamrab olib, Skandinaviyagacha yetgani xabar qilingan.
“Burevestnik”ning so‘nggi sinovi 2023-yilda o‘tkazilgan bo‘lib, Putin o‘shanda bu ishlanma deyarli yakunlanganini ta’kidlagan. Hozirda xalqaro ekspertlar ushbu raketa haqida turlicha fikrda.
Ba’zilar uni haqiqiy tahdid deb baholasa, boshqalar siyosiy ramz sifatida qaramoqda. Shunday bo‘lsada, “Burevestnik”ning muvaffaqiyati va xavfi xalqaro maydonda katta e’tibor qozonmoqda.
