Iv Klaynning "Kaliforniya" asari rekord narxda sotildi

Parijdagi Christie's auksionida fransuz rassomi Iv Klaynning "Kaliforniya" nomli to‘rt metrli kartinasi 18,4 million yevroga, ya’ni taxminan 19,6 million dollar evaziga sotildi. Bu haqda Zamin.uz xabar berdi.

Bu narx rassomning asarlari uchun to‘langan eng yuqori summa hisoblanadi. Mazkur asar 1961 yilda Iv Klayn tomonidan o‘ziga xos ultramarin soyasi – International Klein Blue yordamida yaratilgan.

"Kaliforniya" kartinasi Klaynning asarlari orasida alohida o‘ringa ega bo‘lib, uning nomini olgan kam sonli asarlardan biridir. Kartinaning nomi Kaliforniya shtati sharafiga berilgan.

Rassom ushbu asarni AQShga qilgan yagona safari davomida aynan shu shtatda ilk bor namoyish qilgan. Avvalroq kartina Nyu-York shahridagi Leo Kastelli galereyasida ko‘rgazmaga qo‘yilgan.

Ushbu galereya o‘sha davrning muhim san’at markazlaridan biri hisoblangan. Iv Klayn 1962 yilda vafot etgach, kartina bir necha egasini o‘zgartirib, jumladan, shveysariyalik kollektor Jorj Marsi tomonidan sotib olingan.

2005 yilda "Kaliforniya" kartinasi Nyu-Yorkdagi Pace galereyasi tomonidan sotib olinib, vaqtincha Metropoliten muzeyiga taqdim etilgan va 2008 yilgacha muzeyda namoyish qilingan. ARTnews ma’lumotlariga ko‘ra, kartina ilgari United Technologies kompaniyasining sobiq rahbari Jorj Devidga tegishli bo‘lgan.

U o‘z kompaniyasi orqali Metropoliten muzeyidagi Van Gog va Jasper Jonsga bag‘ishlangan yirik ko‘rgazmalarni moliyalashtirgan.