Toshkent aeroportida kutuvchilar zali kengaytirildi
Toshkent xalqaro aeroportida bir qator ob’ektlarning rekonstruksiyasi muvaffaqiyatli yakunlandi. Bu haqda Zamin.uz xabar berdi.
Jumladan, keluvchilar zali, terrasa hamda uchib ketish terminalidagi VIP-zal yangilandi. Binoning fasadi oldinga surilib, 2200 kvadrat metr qo‘shimcha maydon yaratildi.
Natijada kutuvchilar zalining umumiy maydoni deyarli 5000 kvadrat metrga yetdi, o‘rindiqlar soni esa 200 taga ko‘paytirildi. Yaqin kelajakda aeroport hududida qahvaxonalar, barlar, muzqaymoq do‘konlari, savdo shoxobchalari va gul do‘koni ochilishi rejalashtirilgan.
Shuningdek, yangi kelish yo‘lagi bunyod etildi. Eski yo‘lak endilikda faqat turistik avtobuslar va rasmiy taksilar uchun mo‘ljallangan.
Hozirda aeroportda ikki nafar operator faoliyat yuritmoqda, yaqin orada yana to‘rtta operator ish boshlaydi. Ikkinchi yo‘lakda esa kutuvchilar avtomobillari va taksi agregatorlari to‘xtashi mumkin, biroq bu vaqt 10 daqiqadan oshmasligi shart.
Vaqtga rioya qilish Ichki ishlar vazirligi tizimiga ulangan kameralar orqali nazorat qilinadi va qoidabuzarlarga avtomatik ravishda jarima qo‘llaniladi. Keluvchilar zonasidagi avtoturargoh ham kengaytirilib, endi u 347 ta avtomobilni qabul qila oladi.
Bu rekonstruksiya jarayonining oraliq bosqichi hisoblanadi. Kelajakda keluvchilar va uchuvchilar zallari birlashtirilib, 16 ming kvadrat metrdan oshiq maydonga ega yagona terminalga aylantiriladi.
Aeroportning o‘tkazuvchanlik quvvati soatiga 2400 yo‘lovchiga yetkazilishi ko‘zda tutilgan. Uchib ketish terminalining ikkinchi qavatida 2200 kvadrat metr maydonga ega terrasa ochildi.
Bu hudud soyabonlar, skameykalar va mikroiqlim tizimi bilan jihozlangan. Yaqinda bu yerda bir nechta kafe faoliyat boshlaydi.
Shuningdek, VIP uchib ketish zali yangilandi. Avvalgi 1100 kvadrat metrga yana 300 kvadrat metr maydon qo‘shilib, zal kengaytirildi va dam olish joylari soni oshirildi.
