45 yil bedarak yo‘qolgan erkak oilasiga qaytdi
Hindistonda 45 yil avval bedarak yo‘qolgan erkak o‘z oilasi bilan kutilmaganda qayta uchrashdi. Bu haqda Zamin.uz xabar berdi.
Ushbu voqea haqida "Times of India" nashri xabar berdi. Ma’lumotlarga ko‘ra, Rikhi ismli erkak Himachal-Pradesh shtatining Sirmaur tumanidagi Nadi qishlog‘ida tug‘ilgan.
U 1980 yilda uyidan chiqib ketib, Haryana shtatidagi mehmonxonalardan birida ishlay boshlagan. Ammo o‘sha yili yo‘l-transport hodisasiga uchrab, boshidan jarohat olgan va xotirasini yo‘qotgan.
Uning ota-onasi esa uni halok bo‘lgan deb o‘ylab, qaytib kelishiga umid qilmagan. Hodisa sababli Rikhi o‘z qishlog‘ini unutib, Mumbayga ko‘chib o‘tadi va u yerda yangi hayot boshlaydi.
U Ravi Chaudhary nomi bilan yashab, oila quradi va o‘tmishidan butunlay uziladi. Oradan yillar o‘tib, yana bir jarohat olgach, uning bolalik xotiralari qayta tiklana boshlaydi.
Xotinining yordami bilan u o‘z kelib chiqishini aniqlab, tug‘ilgan qishlog‘ini topishga muvaffaq bo‘ladi. 2025 yil 15 noyabr kuni Rikhi 1600 kilometr yo‘l bosib, Nadi qishlog‘iga qaytadi.
U 45 yildan beri ko‘rmagan aka-uka va opa-singillari bilan uchrashadi. Ushbu voqea Hindistonda katta hayrat bilan kutib olindi.
