Vashington shahrida, Oq uy yaqinidagi 17-chi va Birinchi ko‘chalar kesishgan joyda ikki Milliy gvardiya xodimi o‘qotar quroldan yaralandi. Bu haqda Zamin.uz xabar berdi.
Bu haqda Ichki xavfsizlik vaziri Kristi Noyem CNN telekanaliga ma’lum qildi. Huquqni muhofaza qilish organlari vakillarining xabar berishicha, ushbu hodisa gumonlanuvchi bilan otishma natijasida sodir bo‘lgan.
CNN ma’lumotlariga ko‘ra, gumonlanuvchi qo‘lga olingan va voqea joyidan tibbiy yordam ko‘rsatish uchun olib ketilgan. Otishma sodir bo‘lgan paytda Prezident Donald Tramp Floridaning Uyest-Palm-Bich shahrida joylashgan golf maydonida bo‘lgan.
Oq uy matbuot kotibi Karolin Levittning so‘zlariga ko‘ra, prezidentga ushbu hodisa haqida darhol ma’lumot yetkazilgan. Poytaxt politsiyasi ijtimoiy tarmoqlarda bu hudud xavfsiz ekanligini va gumonlanuvchining qo‘lga olinganini tasdiqladi.
Shu bilan birga, mahalliy aholiga ushbu joydan uzoqroq bo‘lish tavsiya qilindi. Eslatib o‘tamiz, Prezident Tramp avvalroq bir necha shtatdan kelgan Milliy gvardiya xodimlarini federal hukumatga bo‘ysundirish to‘g‘risida favqulodda farmon chiqargan edi.
Shu sababli hozirda yuzlab Milliy gvardiyachilar Vashington ko‘chalarida patrul xizmatini o‘tamoqda.
