Avstraliyada akula hujumi: ayol halok bo‘ldi
Avstraliyaning Yangi Janubiy Uels shtatidagi Kaylis-Bich sohilida akula hujumi yuz berdi. Bu haqda Zamin.uz xabar berdi.
Hodisa vaqtida 20 yoshli ayol halok bo‘lgan, uning yonidagi yosh yigit esa og‘ir ahvolda shifoxonaga olib ketilgan. BBC xabariga ko‘ra, hodisa guvohlaridan biri yigitning oyog‘iga jgut qo‘yib, uning hayotini saqlab qolishga yordam bergan.
Mutaxassislar hujumni “katta buqa akulasi” amalga oshirgan bo‘lishi mumkinligini taxmin qilmoqda. Ushbu akula turi dunyodagi eng xavfli akulalardan biri hisoblanadi.
Hodisadan so‘ng plyaj vaqtincha yopildi va xavfsizlikni ta’minlash maqsadida maxsus ilgaklar o‘rnatildi. Surf Life Saving NSW tashkiloti rahbari Stiv Pirs voqea yuzasidan chuqur afsusda ekanini bildirdi va aholiga yaqin qishloqlar atrofidagi suv havzalarida ehtiyot bo‘lishni, suvga tushmaslikni tavsiya qildi.
Ma’lum bo‘lishicha, bu 2025-yilda Avstraliyada qayd etilgan beshinchi akula hujumi bo‘lib, oxirgi shunday hodisa uch oy oldin Sidneyda sodir bo‘lgan edi.
