Boyqo‘ng‘irda nosozlik: Rossiya parvozlarni to‘xtatishi mumkin
Boyqo‘ng‘ir kosmodromida yuzaga kelgan jiddiy texnik nosozliklar sababli Rossiya inson ishtirokidagi kosmik parvozlarni vaqtincha to‘xtatishga majbur bo‘lishi mumkin. Bu haqda Zamin.uz xabar berdi.
Mutaxassis Georgiy Trishkinning ma’lumotiga ko‘ra, 27-noyabr kuni “Soyuz MS-28” kosmik kemasi uchirilganidan so‘ng, 31-maydonchada joylashgan xizmat kabinasi noma’lum sabablarga ko‘ra ag‘darilib tushgan. Ushbu maydoncha Rossiya uchun Xalqaro kosmik stansiyaga kosmonavtlar jo‘natish imkonini beradigan yagona start maydonchasi sanaladi.
Trishkinning ta’kidlashicha, mazkur hodisa sababli “Soyuz” va “Progress” kemalarining Xalqaro kosmik stansiyaga uchishlari noma’lum muddatga kechiktirilishi mumkin. Mutaxassislarning hisob-kitoblariga ko‘ra, shikastlangan infratuzilmani to‘liq tiklash uchun kamida ikki yil vaqt talab etilishi mumkin.
Shunga qaramay, “Roskosmos” vakillari maydonchadagi texnik muammolarni imkon qadar tezroq bartaraf etish rejalashtirilganini ma’lum qilgan. Kosmodromdagi nosozliklar Rossiyaning kosmik dasturlariga jiddiy ta’sir ko‘rsatishi ehtimoli bor.
