Rossiya Hindistonni yoqilg‘i bilan ta’minlashni davom ettiradi
Rossiya prezidenti Vladimir Putinning ma’lum qilishicha, Moskva Hindistonning tez rivojlanib borayotgan iqtisodiyotini qo‘llab-quvvatlash maqsadida ushbu mamlakatni barqaror va uzluksiz yoqilg‘i bilan ta’minlashni davom ettiradi. Bu haqda Zamin.uz xabar berdi.
Bu haqda u Hindiston Bosh vaziri Narendra Modi bilan uchrashuvdan so‘ng bayonot berdi. Putinning so‘zlariga ko‘ra, energetika sohasidagi hamkorlik tobora mustahkamlanmoqda va Rossiya Hindiston uchun ishonchli yetkazib beruvchi sifatida o‘z o‘rnini mustahkamlab kelmoqda.
Neft va neft mahsulotlari bo‘yicha savdo ishlari izchil davom etayotgani, shuningdek, Hindiston korxonalarida Rossiya neftini qayta ishlash ishlari rejaga muvofiq amalga oshirilayotgani qayd etildi. Shu bilan birga, avgust oyida AQSH prezidenti Donald Tramp Hindistonga Rossiya neftini xarid qilish uchun qo‘shimcha 25 foiz boj joriy etgan edi.
AQSH ma’muriyati bunday choralarning Rossiyaning boshqa hamkorlariga nisbatan ham qo‘llanilishi mumkinligini bildirgan. Ushbu vaziyatga izoh bergan Hindiston Bosh vaziri Narendra Modi mamlakat iqtisodiy manfaatlarini himoya qilishda qat’iy ekanini ta’kidladi.
U, hatto bunday qarorlar katta xarajatlarga olib kelsa ham, Hindiston o‘z siyosatidan chekinmasligini ma’lum qildi. Rossiya Tashqi ishlar vazirligi esa AQSH tomonidan kiritilgan tariflar Hindistonning pozitsiyasiga ta’sir ko‘rsatmaganini, shuningdek, Hindiston Rossiya yoqilg‘isini import qilish rejalarini o‘zgartirishni ko‘zlamayotganini bildirdi.
Bu esa ikki davlat o‘rtasidagi energetika sohasidagi hamkorlikning davom etishini tasdiqlaydi.
