Qozog‘istondagi avariya: ikki o‘zbekistonlik halok bo‘ldi
Qozog‘istonning Aqto‘be viloyatida sodir bo‘lgan yo‘l-transport hodisasi O‘zbekiston fuqarolarining hayotiga ham ta’sir qildi. Bu haqda Zamin.uz xabar berdi.
Rasmiy ma’lumotlarga ko‘ra, 7-dekabr kuni soat 08:57 atrofida Aytekebi tumani hududidan o‘tuvchi respublika ahamiyatiga ega avtomobil yo‘lining 1028-kilometrida yirik avariya yuz berdi. Perm – Toshkent yo‘nalishida harakatlanayotgan Yutong rusumli yo‘lovchi avtobusi noma’lum sabablarga ko‘ra boshqaruvni yo‘qotib, yo‘lning chetiga ag‘darilib ketgan.
Avtobusda jami 49 nafar yo‘lovchi bo‘lib, hodisa oqibatida besh kishi vafot etgan. Afsuski, ulardan ikki nafari O‘zbekiston fuqarosi bo‘lgan.
Qolgan yo‘lovchilar turli darajadagi tan jarohatlari bilan shifoxonaga yotqizilgan. O‘zbekiston Favqulodda vaziyatlar vazirligi ma’lum qilishicha, maxsus ishchi guruh tashkil etilib, halok bo‘lgan yurtdoshlarimizni vatanga olib kelish va dafn marosimlarini uyushtirish ishlari olib borilmoqda.
Shuningdek, vazirlik hodimlari qozog‘istonlik mutasaddilar bilan birgalikda baxtsiz hodisaning sabablarini o‘rganish ustida ishlamoqda. Mazkur hodisa butun jamoatchilikni chuqur qayg‘uga soldi.
Ushbu fojia xalqaro yo‘nalishlarda yo‘lovchilar xavfsizligini ta’minlash, texnik vositalarning holatini nazorat qilish va xavfsizlik talablariga qat’iy rioya qilish masalalarini yana bir bor dolzarb mavzuga aylantirdi.
