Kamilla Rahimova WTA 125 turnirida g‘olib bo‘ldi
Fransiyaning Anje shahrida bo‘lib o‘tgan WTA 125 Open Angers Loire Trélazé turnirida o‘zbekistonlik tennischi Kamilla Rahimova g‘alaba qozondi. Bu haqda Zamin.uz xabar berdi.
Final bahsida u Germaniyadan Tamara Korpachga qarshi kurash olib bordi va ikki set davomida 6:3 va 7:6 hisoblari bilan zafar quchdi. Uchrashuv jami 2 soat 23 daqiqa davom etdi.
Birinchi setda Rahimova o‘zini ancha ishonchli ko‘rsatib, 6:3 hisobida g‘alaba qozondi. U set davomida raqibining xizmatini ikki marta muvaffaqiyatli buzib, o‘z ustunligini saqlab qoldi.
Ikkinchi set esa ancha murosasiz o‘tdi. Dastlab Rahimova breyk amalga oshirib oldinga chiqdi, ammo Korpach o‘zini tiklab, 5:3 hisobida ustunlikni qo‘lga kiritdi.
Shunga qaramay, Rahimova o‘yinga qaytib, hisobni 5:5 ko‘rinishiga olib keldi va tay-breykda o‘z mahoratini namoyish etdi. Natijada, ikkinchi setni ham 7:6 hisobida yakunlab, turnir g‘olibiga aylandi.
Yarim finalda esa Rahimova xorvatiyalik Antonyo Rujichga qarshi kurash olib borib, 4:6, 6:3, 7:5 hisoblarida g‘alaba qozongan edi. Ushbu uchrashuv 3 soat 9 daqiqa davom etdi.
Ma’lum qilinishicha, Kamilla Rahimova yaqinda sport fuqaroligini o‘zgartirib, Rossiya o‘rniga O‘zbekistonni vakillik qila boshlagan. Biroq turnir protokolida uning yonida hali O‘zbekiston bayrog‘i ko‘rsatilmagan.
Mazkur turnir WTA 125 seriyasiga kirib, qattiq qoplamali kortlarda tashkil etilgan. Rahimovaning ushbu g‘alabasi uning xalqaro maydondagi yuksak yutug‘i sifatida e’tirof etilmoqda.
