Rossiyada An-22 samolyoti sinov parvozida qulab tushdi
Rossiya harbiy aviatsiyasida nodir samolyotlardan biri hisoblangan An-22 turbovintli harbiy-transport samolyoti halokatga uchradi. Bu haqda Zamin.uz xabar berdi.
9-dekabr kuni ta’mirdan chiqqan va sinov parvozi o‘tkazayotgan samolyot Ivanovo viloyati hududida qulab tushdi. Rossiya Mudofaa vazirligi bergan ma’lumotga ko‘ra, samolyot aholi yashamaydigan hududga qulagan.
Shundan so‘ng qidiruv-qutqaruv ishlari boshlanib, ekipaj a’zolari taqdiri o‘rganilmoqda. Hodisa vaqtida samolyot bortida yetti kishi bo‘lgani qayd etilgan.
An-22 «Antey» samolyoti sovet davrida ishlab chiqarilgan eng yirik va kuchli turbovintli transport vositalaridan biri hisoblanadi. Uning asosiy vazifasi og‘ir yuklarni uzoq masofalarga tashish, murakkab landshaftlarda qo‘nish edi.
Ushbu modelning ilk parvozi 1965-yilda amalga oshirilgan. Samolyot 60 yildan buyon harbiy va transport vazifalarida xizmat qilib kelmoqda.
Biroq texnikaning uzoq muddatli ekspluatatsiyasi uning eskirishiga sabab bo‘ladi. Oxirgi qolgan An-22 ham ta’mirdan so‘ng sinov parvozi vaqtida falokatga uchradi.
Hodisa tafsilotlari hozircha to‘liq o‘rganilmagan. «Kommersant» nashri xabariga ko‘ra, samolyot havoda parchalanib ketgan va uning qoldiqlari Ivankovo qishlog‘i yaqinida topilgan.
Ekspertlar texnik eskirish, metalning charchashi yoki agregatlar resursi tugashi kabi omillarni asosiy sabablardan biri sifatida ko‘rib chiqmoqda. An-22 samolyoti o‘z davrida dunyodagi eng yirik harbiy transport vositasi bo‘lib, aviatsiya tarixida o‘ziga xos o‘rin egallagan.
Hozirgi kunda esa Rossiya harbiy parkida zamonaviy modellar yetishmasligi sababli, ushbu eski samolyotlarning xizmat muddati bir necha bor uzaytirilgan. Ammo ko‘pchilik mutaxassislar bu kabi texnikalar muzey eksponatiga aylanishi kerak, deb hisoblaydi.
Halokat sabablari bo‘yicha tergov davom etmoqda. Shu bilan birga, samolyotning yoshi, texnik holati va xavfsizlik choralariga oid savollar jamoatchilik orasida muhokama qilinmoqda.
Rasmiy xulosalar berilgunga qadar bu masala hanuz ochiq qolmoqda.
