Shimoliy Koreya sapyorlari Rossiyadan vataniga qaytdi
Shimoliy Koreya harbiylari Rossiyada uch oy davomida faoliyat olib borib, o‘z mamlakatlariga qaytishdi. Bu haqda Zamin.uz xabar berdi.
Bu haqda Koreya Markaziy Axborot Agentligi xabar berdi. Pxenyanda harbiylarni mamlakat yetakchisi Kim Chen In shaxsan kutib oldi.
Kim Chen Inning ta’kidlashicha, Shimoliy Koreya sapyorlari Rossiyaning Kursk viloyatida o‘z vazifalarini muvaffaqiyatli bajarishgan. Ularning faoliyatini yuqori baholab, Kim Chen In shunday dedi: "Bizning harbiylarimiz qisqa vaqt ichida juda murakkab hududni xavfsiz joyga aylantirdi.
Bu ularning fidokorona mehnatining natijasidir." Ma’lum qilinishicha, Shimoliy Koreya sapyorlari Rossiyada 120 kun davomida faoliyat olib borgan, bu vaqt mobaynida to‘qqiz nafar harbiy halok bo‘lgan. KXDR rasmiylari odatda harbiylarning Rossiyada olib borayotgan faoliyati haqida batafsil ma’lumot bermaydi va bu mavzu "xorijdagi operatsiya" iborasi bilan chegaralanadi.
Janubiy Koreya razvedkasining ma’lumotlariga ko‘ra, Pxenyan Rossiyaga taxminan 15 ming askar yuborgan, ulardan 6 ming nafari halok bo‘lgan. Shimoliy Koreya rasmiylari esa bu borada aniq ma’lumot bermagan bo‘lsa-da, bu yilning aprel oyida Rossiya-Ukraina urushida ishtirok etayotgan harbiylarining mavjudligini tasdiqlagan edi.
