Sidneyda Hanukka bayrami chog‘ida qurolli hujum bo‘ldi

Avstraliyaning Sidney shahridagi Bondi-Bich hududida Hanukka bayrami davomida qurolli hujum yuz berdi. Bu haqda Zamin.uz xabar berdi.

Voqea yakshanba kuni kechqurun sodir bo‘lgan. Rasmiy ma’lumotlarga ko‘ra, hujum oqibatida 11 kishi hayotdan ko‘z yumgan, 29 nafar fuqaro turli darajada tan jarohati olib, shifoxonaga yetkazilgan.

Tadbirda mingga yaqin odam ishtirok etgan. Politsiya hujumni yahudiy jamoasiga qarshi qaratilgan ataylab qilingan jinoyat sifatida baholamoqda.

Gumonlanuvchilardan biri hodisa joyida halok bo‘lgan, ikkinchisi esa og‘ir ahvolda shifoxonaga yotqizilgan. Hozirda politsiya hujumga boshqa shaxslar ham aloqador bo‘lishi mumkinligini o‘rganmoqda.

Avstraliya bosh vaziri Entoni Albanize hodisani qattiq qoraladi va bu mamlakat uchun og‘ir kun ekanini ta’kidladi. Uning so‘zlariga ko‘ra, xavfsizlik xizmatlari voqea sabablarini aniqlash va aybdorlarni javobgarlikka tortish uchun barcha choralarni ko‘rmoqda.

Hodisa nafaqat Avstraliya ichida, balki xalqaro miqyosda ham katta xavotir uyg‘otdi. Turli diniy va jamoat tashkilotlari zo‘ravonlikni keskin qoralab, tinchlikni saqlashga chaqiruvchi bayonotlar berdi.

Voqea sodir bo‘lgan hudud va boshqa jamoat joylarida xavfsizlik choralari kuchaytirilgan.