Yo‘lovchi sog‘lig‘i uchun samolyot Bahraynga qo‘ndi.
Air Samarkand aviakompaniyasining 9S-3306 reysi Saudiya Arabistonining Jidda shahridan Toshkentga uchayotgan edi. Bu haqda Zamin.uz xabar berdi.
Parvoz davomida yo‘lovchilardan birining yuragi to‘xtab qolgani sababli samolyot Bahrayn aeroportiga favqulodda qo‘nishga majbur bo‘ldi. Havo kemasi komandiri Roman Degtev va ikkinchi uchuvchi Yegor Smirnov vaziyatni baholab, yaqin atrofdagi aeroportga qo‘nish qarorini qabul qilishdi.
Favqulodda qo‘nishdan oldin samolyotdagi kuzatuvchilar, Svetlana Bolkonskaya boshchiligida, bemorga birinchi tibbiy yordam ko‘rsatishdi. Samolyot Bahrayn aeroportiga qo‘ngach, tibbiyot xodimlari darhol bortga chiqib, bemorning ahvolini barqarorlashtirishga muvaffaq bo‘lishdi.
Shundan so‘ng, ayol mahalliy shifoxonaga olib ketildi. Favqulodda vaziyat bartaraf etilgach, samolyotga yonilg‘i quyildi va u Toshkentga parvozini davom ettirdi.
Samolyot belgilangan manzilga mahalliy vaqt bilan soat 9:49 da yetib keldi. Ushbu holatda barcha yo‘lovchilarning xavfsizligi va sog‘lig‘i ustuvor bo‘lgani ta’kidlanadi.
