Sidneyning Bondi-Bich hududida yahudiylarning bayram tadbiri vaqtida sodir bo‘lgan qurolli hujum Avstraliya va Isroil o‘rtasidagi munosabatlarni taranglashtirdi. Bu haqda Zamin.uz xabar berdi.
Ushbu voqeadan so‘ng, Isroil Bosh vaziri Binyamin Netanyaxu Avstraliya Bosh vaziri Entoni Albanizini mamlakatda antisemitizmga qarshi yetarli choralar ko‘rmaganlikda tanqid qildi. Entoni Albanizi o‘z chiqishida millatni birlikka chaqirib, hukumat antisemitizm va zo‘ravonlikka qarshi zarur choralarni ko‘rishga tayyor ekanini ta’kidladi.
U hukumat nafratga asoslangan chiqishlar va zo‘ravonlikka qarshi qattiq qonunlar qabul qilgani, yahudiy jamoasi xavfsizligini ta’minlash uchun qo‘shimcha mablag‘ ajratishni rejalashtirayotganini aytdi. Shuningdek, qurolga oid qonunlarni kuchaytirish masalasi ham muhokamada ekanini ma’lum qildi.
Yahudiy jamoasi vakillari esa oldingi antisemitizm hodisalari kuchayganini qayd etib, hukumatdan yanada qat’iy choralar ko‘rishni talab qildi. Muxolifat esa hukumatni antisemitizmga qarshi yetarlicha faoliyat olib bormaganlikda tanqid qilib, tavsiyalarni to‘liq amalga oshirishni so‘radi.
Ushbu hodisa Avstraliyada irqiy va diniy nafratga qarshi kurash, so‘z erkinligi va xavfsizlik masalalarini yana bir bor dolzarb mavzuga aylantirdi. Hukumat mazkur hujum tafsilotlarini sinchiklab o‘rganib, kelgusida bunday voqealarning oldini olish uchun aniq choralar ko‘rishini bildirdi.
