Hindistonda uy bekalariga moliyaviy yordam ko‘rsatilmoqda
Hindistonda uy mehnatini e’tirof etish va uni qadrlashga qaratilgan yirik ijtimoiy loyiha amalga oshirilmoqda. Bu haqda Zamin.uz xabar berdi.
Bu tashabbus doirasida mamlakatning bir qator shtatlarida uy bekalariga davlat tomonidan muntazam moliyaviy yordam ko‘rsatilmoqda. Uy xo‘jaligini yuritish, bolalar va qariyalarni parvarish qilish bilan band ayollarga maxsus pul o‘tkazmalari ajratilmoqda.
Mazkur dastur haqida BBC xabar bergan. Ayni paytda Hindistonning kamida 12 ta shtatida ushbu dastur faoliyat yuritmoqda.
Rasmiy ma’lumotlarga ko‘ra, dasturdan foydalanuvchi ayollar soni 118 millionga yaqinlashgan. To‘lovlar bevosita ayollarning shaxsiy bank hisob raqamlariga o‘tkaziladi.
Mablag‘ning sarflanishi bo‘yicha hisobot talab qilinmaydi. Oylik to‘lov miqdori shtatlarga qarab 1000 dan 2500 rupiyagacha, ya’ni 12–30 AQSH dollari atrofida.
Bu mablag‘, ayniqsa, qishloq joylari va kam ta’minlangan oilalar uchun katta ahamiyatga ega bo‘lib, asosan kundalik ehtiyojlar, oziq-ovqat va bolalar ta’limiga sarflanmoqda. Mutaxassislar fikricha, loyiha nafaqat moliyaviy yordam, balki uy mehnatini rasmiy tan olish va qadrlashga qaratilgan.
Xalqaro tashkilotlar ma’lumotlariga ko‘ra, ayollarning uy xo‘jaligi va parvarish bilan bog‘liq mehnati ko‘pincha iqtisodiy tizimda hisobga olinmaydi. Bu esa ularning iqtisodiy imkoniyatlarini cheklab qo‘yadi.
Ushbu dastur tufayli ko‘plab ayollar moliyaviy mustaqillikka erishmoqda, oiladagi mavqei mustahkamlanmoqda va o‘ziga bo‘lgan ishonchi ortmoqda. Shu bilan birga, loyiha atrofida qizg‘in bahslar davom etmoqda.
Ayrim tanqidchilar bunday to‘lovlar gender rollarini mustahkamlashi va ayollarning mehnat bozoriga chiqishini qiyinlashtirishi mumkinligini ta’kidlashmoqda. Boshqalar esa bu tashabbus siyosiy maqsadlarda qo‘llanilayotganidan xavotir bildirmoqda.
Hukumat vakillari bu to‘lovlarni «uy xo‘jaligi maoshi» emas, balki ijtimoiy qo‘llab-quvvatlash chorasi sifatida baholashmoqda. Shunga qaramay, bu tajriba boshqa davlatlar tomonidan ham diqqat bilan kuzatilmoqda.
Agar loyiha muvaffaqiyatli bo‘lsa, u ayollar mehnatini baholash va ijtimoiy siyosatni takomillashtirishda yangi yondashuvlarga yo‘l ochishi mumkin.
