Bashar Asad Moskvada yashab, tibbiyotga qaytdi
Suriya sobiq prezidenti Bashar Asad oxirgi bir yil davomida Moskvada yashayotgani va bu yerda yana tibbiyot sohasiga qaytgani haqida xabarlar tarqaldi. Bu haqda Zamin.uz xabar berdi.
Britaniyaning The Guardian nashri Rossiya va Suriyadagi manbalarga asoslanib, Asad hozirda oftalmologiya bo‘yicha mashg‘ulotlarda ishtirok etayotganini ma’lum qilgan. Bu faoliyatni u moliyaviy muammolar emas, balki shaxsiy qiziqishi sabab davom ettirmoqda.
Asad oilasiga yaqin bo‘lgan manbalarning aytishicha, Bashar Asad urushdan avval Damashqda ko‘z kasalliklari bo‘yicha shifokor sifatida faoliyat yuritgan. U tibbiyotdan butunlay voz kechmagan va bu sohani o‘zining haqiqiy qiziqish sohasi deb biladi.
Shuningdek, Asad rus tilini chuqur o‘rganishga ham jiddiy kirishgani aytilmoqda. Nashrning ta’kidlashicha, Asadlar oilasi moddiy jihatdan barqaror bo‘lsa-da, Bashar Asad o‘zi deyarli to‘liq izolyatsiyada yashamoqda.
U Rossiya va Suriya elitalari bilan erkin muloqot qilish imkoniyatiga ega emas. U bilan faqat bir nechta yaqin shaxslar, jumladan, sobiq vazir Mansur Azzam va sobiq iqtisodiy maslahatchi Yassar Ibrohim aloqada.
The Guardian’ga ko‘ra, Rossiya prezidenti Vladimir Putin endi Bashar Asadni siyosiy jihatdan muhim shaxs sifatida ko‘rmaydi. Moskvada unga nufuzli arbob sifatida e’tibor berilmaydi, hatto rasmiy tadbirlarga ham taklif qilinmaydi.
Oxirgi oylarda Asad oilasi jamoatchilik oldida juda kam ko‘rinmoqda. Faqat bu yil yozda Asadning qizi Zeynning Moskva davlat xalqaro munosabatlar institutini tamomlagani munosabati bilan oila bir marotaba omma oldida paydo bo‘lgan.
Ma’lum bo‘lishicha, Asadning farzandlari tez-tez Birlashgan Arab Amirliklariga borib turishadi. Avvaliga oila BAAga doimiy ko‘chib o‘tishni rejalashtirgan, biroq siyosiy noqulayliklar tufayli bu rejadan voz kechgan.
Shuningdek, Bashar Asad Moskvaga kelgan dastlabki davrda rafiqasi Asmaning leykemiya kasalligiga qarshi davolanishiga e’tibor qaratgan. Eksperimental terapiya natijasida Asma o‘zini yaxshiroq his qila boshlagan.
Hozirda Bashar Asad Suriyadagi vaziyat bo‘yicha o‘z qarashlarini ommaviy axborot vositalarida bayon etishni rejalashtirmoqda. U Rossiyaning RT kanali va ayrim xorijiy podkastlar uchun intervyular berishni mo‘ljallagan, biroq bu reja Rossiya hukumatining ruxsatiga bog‘liq.
