11 ming qor shari: Yozefning noodatiy rekordi
Germaniyaning Nyurnberg shahrida yashovchi Yozef Kardinal o‘zining noodatiy kolleksiyasi bilan Ginnesning jahon rekordini o‘rnatdi. Bu haqda Zamin.uz xabar berdi.
U 11 mingta qor sharlaridan iborat kolleksiya yig‘ib, ularni uyida maxsus joylashtirgan. Ushbu kolleksiya mehmonlar uchun haqiqiy qish ertagini eslatuvchi muhit yaratadi.
Yozefning bu xobbisi 1984 yilda boshlangan. O‘sha paytda u o‘zining birinchi qor sharini sovg‘a sifatida olgan edi.
O‘shandan buyon do‘stlari unga bunday sharlarni sovg‘a qilishni davom ettirishgan, Yozef esa o‘zi ham ularni yig‘ishni boshlagan. U har bir sayohat davomida yangi namuna topishga harakat qilganini aytadi.
Kolleksiyaning eng qadimgi eksponati 1889 yilda Parijda yaratilgan shisha shar bo‘lib, unda Eyfel minorasining miniatyura ko‘rinishi aks etgan. Shuningdek, u o‘z uyi tasvirlangan va maxsus yubiley uchun yasalgan sharlarni ham saqlaydi.
Kolleksiyada turli o‘lchamdagi sharlar, jumladan, juda kichik va egasining bo‘yidan baland bo‘lgan ulkan sharlar ham bor. Eng qiziqarli eksponatlar orasida Coca-Cola telefoni shaklidagi shar, "Titanik" kemasining cho‘kishi, Santa-Klaus boshqargan vertolyot va turli mashhur filmlar, jumladan, "Garri Potter" va "Yulduzlar jangi" mavzusidagi sharlar bor.
Hatto pandemiya davriga oid "Toj-2020" deb nomlangan qorbobo tasvirlangan shar ham mavjud. Qish mavzusini yaxshi ko‘rganiga qaramay, Yozef quyoshli ob-havoni afzal ko‘radi.
"Nyurnbergda qor kam yog‘adi, shuning uchun men eng ko‘p qorni o‘z kolleksiyamdagi sharlar orqali ko‘raman," deydi Yozef kulib.
