Putin: Rossiya "tarixiy yerlarini" jang bilan qaytarishi mumkin
Rossiya prezidenti Vladimir Putin Mudofaa vazirligi kengaytirilgan yig‘ilishida Ukrainaga nisbatan qat’iy bayonot bilan chiqish qildi. Bu haqda Zamin.uz xabar berdi.
Ushbu bayonot haqidagi xabarni Britaniyaning "The Daily Express" nashri e’lon qildi. Xabarda aytilishicha, Putin Kiyev hududiy masalalar bo‘yicha mazmunli muzokaralarga tayyor bo‘lmasa, Rossiya jang maydonida o‘zining "tarixiy yerlarini ozod qilish"ga majbur bo‘lishi mumkinligini ta’kidlagan.
Nashr bu bayonotni Ukraina uchun jiddiy ogohlantirish sifatida baholadi. Yig‘ilish davomida Putin Moskva mojaroni avvalo diplomatik yo‘l bilan hal qilish tarafdori ekanini qayd etdi.
Biroq, u Kiyev va G‘arb davlatlari mohiyatli muzokaralardan voz kechsa, Rossiya o‘z maqsadlariga harbiy yo‘l orqali erishishda davom etishini ma’lum qildi. Shuningdek, Rossiya rahbari Qurolli kuchlarining hozirda rivojlanish va kuchayish jarayonida ekanini ta’kidladi.
Unga ko‘ra, Ukraina armiyasi tanazzulga yuz tutgan, ommaviy tark etish va qochqinlik holatlari kuzatilmoqda. Putinning ushbu bayonoti mintaqadagi vaziyat tobora keskinlashayotganidan dalolat bermoqda.
