AQShning Oq uyida sobiq prezidentlarning portretlari ostida yangi ma'lumot taxtalari o‘rnatildi. Bu haqda Zamin.uz xabar berdi.
Ushbu taxtalarda davlat rahbarlarining faoliyati tanqidiy va siyosiy tusda ifodalangan. Bu tashabbus amaldagi prezident Donald Tramp tomonidan ilgari surilgan bo‘lib, AQSh ichkarisida ham, xalqaro maydonda ham katta muhokamalarga sabab bo‘ldi.
"Prezidentlarning shon-sharaf xiyoboni" deb nomlangan ushbu ekspozitsiya Oq uyning G‘arbiy qanoti devorlarida joylashgan. Ilgari bu yerda prezidentlarning portretlari neytral tarixiy ma'lumotlar bilan taqdim etilgan edi.
Endilikda esa ayrim prezidentlar haqidagi lavhalar bahsli ta'riflar bilan boyitilgan. Reuters axborot agentligining yozishicha, lavhalarda keltirilgan ma'lumotlar ko‘pincha subyektiv baholarga asoslangan va ba'zi tanqidlar tarixiy manbalarda tasdiqlanmagan.
Bu holat tarixchilar va siyosiy tahlilchilar o‘rtasida jiddiy savollarni yuzaga keltirmoqda. Eng katta o‘zgarishlar Barak Obama va Jo Baydenga oid qismlarda kuzatilgan.
Baydenga bag‘ishlangan lavhada u "Amerika tarixidagi eng yomon prezident" sifatida ta'riflanib, korrupsiya va "aqliy tanazzul"da ayblangan. Shuningdek, Baydenning rasmiy portreti o‘rniga avtopero surati qo‘yilgan, bu esa uning farmonlar imzolash uslubiga tanqid sifatida talqin qilinmoqda.
Barak Obama esa "eng ziddiyatli siyosiy arboblardan biri" deb baholangan. Lavhada uning ichki va tashqi siyosatdagi qarorlari tanqid qilingan.
Ekspozitsiyada Hillari Klintonning 2016 yilgi saylovdagi mag‘lubiyati hamda avvalgi prezidentlarning urushlar va iqtisodiy strategiyalar bo‘yicha qarorlari Tramp ma'muriyati nuqtayi nazaridan yoritilgan. Ko‘plab tarixchilar va ommaviy axborot vositalari vakillari bu yondashuvdan tashvishda ekanliklarini bildirmoqda.
Ularning fikricha, Oq uy milliy birlik ramzi sifatida barcha prezidentlarga nisbatan hurmatni saqlab qolishi lozim. Oq uy rasmiylari esa yangi lavhalarni "prezidentlar faoliyatining haqqoniy aks ettirilishi" deb baholamoqda.
Biroq ayrim bayonotlar hujjatli dalillar bilan tasdiqlanmagani sababli, bu ko‘rgazma AQShda tarix va siyosatni talqin qilish masalasida yangi bahslarni keltirib chiqarmoqda.
