Afg‘oniston ayollar uchun eng yomon mamlakat deb topildi

Jorjtaun universiteti (AQSh) tadqiqotchilari tomonidan 188 ta davlatda ayollarning ijtimoiy ahvoli o‘rganilib, Afg‘oniston ayollar uchun dunyodagi eng yomon mamlakat deb topildi. Bu haqda Zamin.uz xabar berdi.

Bu haqda “Hasht e Subh Daily” nashri xabar berdi. 2025 yil 31 dekabrdagi tadqiqot hisobotida ayollar xavfsizligi va huquqlari bo‘yicha eng past ko‘rsatkichlar Afg‘onistonda qayd etilgan.

Ushbu davlatdan keyingi o‘rinlarda Yaman, Sudan, Gaiti va Burundi joylashgan. Afg‘onistonda ayollarning ijtimoiy holati inklyuzivlik, adolat va xavfsizlik mezonlari asosida baholangan.

Ayollar xavfsizligi va ularga nisbatan munosabat boshqa davlatlarga nisbatan ancha yomon ahvolda bo‘lib, ular jamiyatning eng zaif qatlamiga kiritilgan. Afg‘onistonda ayollar ta’lim olish va ishlash huquqidan ko‘p hollarda mahrum etilgan.

Bu holat ularning asosiy xizmatlardan foydalanish imkoniyatini cheklab, insonparvarlik yordamlari yetkazib berilishini ham qiyinlashtiradi. Natijada, Afg‘oniston BMTning gender rivojlanish indeksida Yamandan keyingi eng past o‘rinni egallagan.

Shuningdek, Afg‘oniston ko‘chalarida ayollar xavfsizligi ta’minlanmagan. Tolibon muvaqqat hukumati ayollarning jamoat joylaridagi harakatlarini qat’iy nazorat qilmoqda.

Bu esa ayollarning erkin harakatlanishini cheklabgina qolmay, mamlakatdagi beqarorlik va tinchsizlik darajasini ham oshirmoqda.