Ispaniyada kuchli sovuq sabab yo‘llar yopildi
Ispaniyada kuchli sovuq va qor yog‘ishi tufayli transport harakati jiddiy qiyinchiliklarga duch kelmoqda. Bu haqda Zamin.uz xabar berdi.
Mamlakat bo‘ylab 40 ta yo‘lda harakat vaqtincha to‘xtatildi, og‘ir yuk mashinalari va avtobuslar qatnovi cheklangan. Mahalliy axborot agentliklari xabariga ko‘ra, noqulay ob-havo sharoiti sabab sakkizta asosiy magistralning ayrim qismlari hozirgacha yopiq qolmoqda.
Leon va Astorga hududlaridagi milliy yo‘llarda ham cheklovlar davom etmoqda. Eng og‘ir vaziyat Kastilya-La-Mancha mintaqasidagi Gvadalaxara provinsiyasida kuzatilmoqda.
Bu yerda havo harorati keskin pasayib, -14 darajagacha tushishi kutilmoqda. Shu sababli, sinoptiklar tomonidan “qizil” darajadagi ogohlantirish e’lon qilindi.
Bundan tashqari, past hududlarda qor yog‘ishi sabab yana beshta shaharda “sariq” darajadagi ogohlantirish berilgan. Hukumat fuqarolardan ehtiyot choralarini ko‘rishni va zaruratsiz safarga chiqmaslikni so‘ramoqda.
