AQSH 75 davlat uchun immigratsion vizalarni cheklaydi
AQSH Davlat departamenti 75 ta davlat fuqarolari uchun immigratsion vizalarni vaqtincha rasmiylashtirmaslik rejasini tasdiqladi. Bu haqda Zamin.uz xabar berdi.
Bu chora 2026-yil 21-yanvardan kuchga kirishi va qancha davom etishi hozircha noma’lum ekani aytilmoqda. Mazkur qaror AQSHga ko‘chib kelganidan keyin davlat yordamiga muhtoj bo‘lish ehtimoli yuqori bo‘lgan shaxslarni baholash (“public charge”) mezoniga asoslangan.
Shu sababli elchixonalarga vizalarni ko‘rib chiqish tartibini qayta ko‘rib chiqish bo‘yicha ko‘rsatmalar berilgan. Muhim jihati shundaki, gap faqat immigratsion vizalar haqida bormoqda.
Turistik yoki biznes kabi noimmigratsion vizalar bu cheklovga kirmaydi. Cheklov qo‘llanilishi kutilayotgan davlatlar ro‘yxati hozircha aniq emas.
Ayrim manbalarda Somali, Rossiya va Eron kabi davlatlar tilga olingan bo‘lsa-da, rasmiy va to‘liq ro‘yxat e’lon qilinmagan. O‘zbekistonga kelsak, hozircha mamlakatimiz bu ro‘yxatda tilga olinmagan.
Ammo bu masalada yakuniy xulosalar rasmiy ro‘yxat e’lon qilingach ma’lum bo‘ladi.
