AQSh 75 mamlakat uchun immigratsion vizalarni to‘xtatdi
AQSh hukumati immigratsiya siyosatini qat’iylashtirish bo‘yicha yangi qaror qabul qildi. Bu haqda Zamin.uz xabar berdi.
Donald Tramp ma’muriyati tomonidan 2026 yil 21 yanvardan boshlab dunyoning 75 ta davlatiga, jumladan O‘zbekiston va Qozog‘iston fuqarolariga immigratsion vizalar berish vaqtincha to‘xtatildi. Bu qaror qachon bekor qilinishi hozircha noma’lum.
Mazkur cheklovlar ostiga Markaziy Osiyo davlatlari bilan bir qatorda Pokiston, Bangladesh, Rossiya, Belarus, Gruziya, Armaniston kabi mamlakatlar ham tushdi. Bundan tashqari, bir qator Afrika va Lotin Amerikasi davlatlari ham ro‘yxatda mavjud.
AQSh Davlat departamenti bunday qarorni bir nechta omillar bilan izohladi: muhojirlarning moliyaviy yordamga qaramlik xavfi, viza arizalarini yanada sinchkovlik bilan tekshirish zarurati va mamlakat xavfsizligini ta’minlash. Reuters axborot agentligi ma’lumotlariga ko‘ra, cheklovlar hatto vizasi tayyor bo‘lgan, biroq hali konsullikdan olib chiqilmagan shaxslarga ham tegishli.
Davlat departamenti xodimlariga bunday vizalarni ham rad etish bo‘yicha ko‘rsatmalar berilgan. Biroq bu cheklovlar sayyohlik va vaqtinchalik tashrif vizalariga taalluqli emas.
Buning asosiy sababi – AQShning 2026 yilgi Futbol bo‘yicha Jahon chempionati va 2028 yilgi Olimpiya o‘yinlariga mezbonlik qilishi bilan bog‘liq. Hukumat ushbu tadbirlarga keluvchi mehmonlar va sayyohlar oqimini saqlab qolishni maqsad qilgan.
Mutaxassislarning fikricha, bu qaror kelgusi bir yil ichida 315 mingga yaqin qonuniy muhojirning AQShga kirishini cheklaydi. Tramp ma’muriyati hukmronligi davomida 100 mingdan ortiq viza bekor qilinib, H-1B kabi yuqori malakali mutaxassislar uchun mo‘ljallangan vizalar bo‘yicha ham qo‘shimcha to‘siqlar joriy etilgan.
Savol tug‘iladi: AQShning bunday qat’iy cheklovlari noqonuniy migratsiyani kamaytiradimi yoki aksincha, odamlarni noqonuniy va xavfli yo‘llarni tanlashga majbur qiladimi? Bu borada turli fikrlar mavjud.
Ayni paytda esa yangi tartiblar muhojirlar hayotiga jiddiy ta’sir ko‘rsatishi aniq.
