Adam Qodirov yo‘l hodisasida jarohat oldi
Checheniston rahbari Ramzon Qodirovning o‘g‘li Adam Qodirov Grozniy shahrida yo‘l-transport hodisasiga uchragani haqida ijtimoiy tarmoqlarda xabarlar tarqaldi. Bu haqda Zamin.uz xabar berdi.
Manbalarga ko‘ra, hodisa natijasida Adam Qodirov og‘ir ahvolda shifoxonaga olib borilgan. Dastlabki ma’lumotlarga qaraganda, u hushsiz holatda respublika shifoxonasiga yetkazilgan va shifokorlar tomonidan reanimatsiya qilingan.
Keyinchalik uni Moskvaga olib ketish rejalashtirilgani haqida ma’lumotlar bor. Xabarlarda aytilishicha, hodisa Qodirov kortejining katta tezlikda harakatlanishi oqibatida sodir bo‘lgan bo‘lishi mumkin.
Bir nechta avtomobil hodisaga jalb etilgan, shuningdek, bir necha kishi jarohat olgan bo‘lishi ehtimoli bildirilmoqda. Voqeadan so‘ng Grozniy shahrida ayrim yo‘llar vaqtinchalik yopilgan, jumladan, shifoxona tomon boruvchi yo‘llar cheklangan.
18 yoshli Adam Qodirov Chechenistonning eng ko‘p tilga olinadigan shaxslaridan biri sanaladi. Ayrim manbalarda u Checheniston xavfsizlik kengashi kotibi va Ichki ishlar vazirligi faoliyatiga mas’ul shaxs sifatida qayd etiladi.
Hozircha rasmiy idoralar tomonidan hodisa yuzasidan to‘liq va ochiq bayonot berilmagan. Shu sababli, voqea tafsilotlari faqatgina manbalarning bergan ma’lumotlari darajasida qolmoqda.
Rasmiy tasdiq kelishi kutilmoqda.
