Adam Qodirov ishtirokidagi avtohalokat tafsilotlari tarqaldi
Checheniston rahbari Ramzan Qodirovning o‘g‘li Adam Qodirov ishtirok etgan avtohalokat bilan bog‘liq voqea atrofida turli xabarlar tarqalmoqda. Bu haqda Zamin.uz xabar berdi.
Ma’lumotlarga ko‘ra, ushbu yo‘l-transport hodisasi uchun mas’uliyat bir yo‘l-patrul xizmati xodimiga yuklangan. Manbalarning xabar berishicha, kortejning harakati uchun yo‘l to‘liq yopilmagani sababli ayb ushbu xodim zimmasiga qo‘yilgan.
16-yanvar kuni Adam Qodirov oila a’zolari bilan birgalikda Ramzan Qodirovning jiyani Hamzat Qodirovning tug‘ilgan kunini nishonlagan. Keyinchalik ular noma’lum manzilga yo‘l olishgan.
Ma’lum qilinishicha, kortej yuqori tezlikda harakatlanib, yashil chiroqda harakatlanayotgan avtomobil bilan to‘qnashgan. Hodisa Grozniy shahridagi Staropromislovskiy shossesida sodir bo‘lgani aytilmoqda.
Ijtimoiy tarmoqlarda ushbu joydan olingan videolar tarqalgan, biroq rasmiy idoralar bu videolarni tasdiqlamagan. Adam Qodirov hozirda Moskvadagi shifoxonada davolanmoqda va uning hayotiga xavf yo‘qligi ma’lum qilingan.
Kortejdagi uch nafar qo‘riqchi ham Moskvaga olib ketilgan, ulardan biri og‘ir jarohatlangan, hatto orqa miyasiga zarar yetgani haqida taxminlar bor. Rucriminal nashrining xabariga ko‘ra, avtohalokat oqibatida bir kishi halok bo‘lgan, to‘rt kishi esa og‘ir jarohat olgan.
Shuningdek, Grozniy shahridagi kasalxonaga jami 20 ga yaqin jabrlanuvchi olib kelingani aytilmoqda. Ammo bu raqamlar rasmiy manbalar tomonidan tasdiqlanmagan.
Voqea yuzasidan Checheniston hukumati va boshqa rasmiy idoralar hozircha izoh bermagan. Ijtimoiy tarmoqlarda esa ushbu hodisa keng muhokama qilinmoqda.
Voqeaning haqiqiy tafsilotlari rasmiy idoralar tomonidan bayonot berilgach oydinlashishi kutilmoqda.
